பிரதமரின் பெயரைப் பயன்படுத்தி மேற்கொள்ளப்படும் விளம்பரம் குறித்து எச்சரிக்கை

 பிரதமரின் பெயரைப் பயன்டுத்தி மேற்கொள்ளப்படும் முதலீட்டு விளம்பரம் குறித்து அவசர எச்சரிக்கை விடுக்கப்பட்டுள்ளது. தாம் எந்தவொரு சந்தர்ப்பத்திலும் எந்தவொரு முதலீட்டாளரையோ அல்லது முதலீட்டுத் திட்டங்களையோ விளம்பரப்படுத்த முன்னிற்கவில்லை என பிரதமர் ஹரிணி அமரசூரிய தெரிவித்துள்ளார்.

தனது உருவம் மற்றும் குரலைப் பயன்படுத்தி சமூக ஊடகங்களில் பரப்பப்படும் அனைத்து காணொளிகளும் முற்றாகப் போலியானவை என என குறிப்பிட்டுள்ளார்.

கொழும்பு பங்குச் சந்தையில் நடைபெற்ற நிகழ்வொன்றில் உரையாற்றிய பிரதமர் இதனைக் குறிப்பிட்டுள்ளார். சமூக ஊடகங்கள் மற்றும் வாட்ஸ்அப் தளங்கள் வாயிலாக பல்வேறு நிதி மற்றும் முதலீட்டுத் திட்டங்களை விளம்பரப்படுத்திப் பரப்பப்படும் இத்தகைய போலி காணொளிகளைக் கண்டு ஏமாற வேண்டாம் எனப் பொதுமக்களிடம் கேட்டுக்கொண்டுள்ளார்.

எனது உருவம் மற்றும் குரலைப் பயன்படுத்தி பல்வேறு முதலீட்டுத் திட்டங்களை விளம்பரப்படுத்தும் போலி காணொளிகள் பல சமூக ஊடகங்களில் பரவி வருவதாகத் தெரிவித்துள்ளார்.

இவ்வாறான விளம்பரங்களுக்கும் தனக்கும் எந்தவித தொடர்பும் இல்லை எனவும் நான் எந்தவொரு முதலீட்டாளருக்காகவும் முன்னிற்பதோ அல்லது அத்தகைய விடயங்களை விளம்பரப்படுத்துவதோ இல்லை எனவும் தெரிவித்துள்ளார்.

இத்தகைய காணொளிகளைக் கண்டவுடன் அவை போலியானவை என்பதை பொதுமக்கள் புரிந்துகொள்ள வேண்டும் எனக் குறிப்பிட்டுள்ளார்.

சமூகத்தில் நிதி சார்ந்த விழிப்புணர்வையும் எழுத்தறிவையும் வளர்த்துக் கொள்வதன் அவசியத்தை பிரதமர் சுட்டிக்காட்டியுள்ளார்.

நம்ப முடியாத அளவுக்கு அதிக லாபம் ஈட்டித் தருவதாக வாக்குறுதி அளிக்கும் இத்தகைய மோசடி நிதிச் செயற்பாடுகளில் எந்த உண்மையும் இல்லை என்பதைப் புரிந்துகொள்ளும் அளவுக்குப் பொதுமக்களுக்கு அடிப்படை அறிவும் நிதி விழிப்புணர்வும் இருக்க வேண்டும் என வலியுறுத்தியுள்ளார்.

அவ்வளவு எளிதாகக் குறுகிய காலத்தில் பணம் சம்பாதிக்க முடிந்தால் நாட்டின் அனைத்து மக்களும் உடனடியாகப் பணக்காரர்களாகிவிட முடியும் என நகைச்சுவையாகச் சுட்டிக்காட்டியுள்ளார்.

பொதுமக்கள் தங்களின் கஷ்டப்பட்டு சம்பாதித்த பணத்தை மோசடிக்காரர்களிடம் இழந்துவிடாதவாறு பாதுகாத்துக் கொள்ள வேண்டும் எனவும், சரியான நிதி விழிப்புணர்வுடன் அவதானமாகச் செயல்பட வேண்டும் எனவும் பிரதமர் ஹரினி தெரிவித்துள்ளார்.