லங்காசிறி FM
ஸ்பெயினை அதிரவைத்த கேப் வெர்டே கோல்கீப்பர்! உலகக்கோப்பையில் காத்திருக்கும் நெகிழ்ச்சி தருணம்..
2026 உலகக் கோப்பை கால்பந்து தொடரில் ஸ்பெயின் அணிக்கு எதிராக சிறப்பான ஆட்டத்தை வெளிப்படுத்திய கேப் வெர்டே அணியின் 40 வயதான கோல்கீப்பர் வோசின்ஹாவின் தாய்க்கு அமெரிக்க அரசு அவசர விசா வழங்கியுள்ளது.
உலகக் கோப்பையில் தனது முதல் போட்டியிலேயே ஸ்பெயின் அணியின் 7 முக்கியமான கோல் முயற்சிகளைத் தடுத்து, போட்டியை 0-0 என்ற சமநிலையில் முடிக்க வோசின்ஹா முக்கிய பங்காற்றினார்.இந்த ஆட்டத்தின் மூலம் உலகளாவிய கவனத்தை அவர் ஈர்த்தார்.
வரலாற்றுச் சாதனை
போட்டி முடிந்த பின்னர், தனது வரலாற்றுச் சாதனையை நேரில் காண தனது தாய் அனா கேண்டிடா எவோரா மைதானத்தில் இல்லாதது குறித்து வோசின்ஹா உணர்ச்சிவசப்பட்டு கண்ணீர் மல்கப் பேசியிருந்தார்.
விசா நடைமுறைகளில் ஏற்பட்ட சிக்கல்கள் மற்றும் செல்லுபடியாகும் கடவுச்சீட்டு இல்லாத காரணத்தால் அவரது தாயால் அமெரிக்காவுக்கு பயணம் செய்ய முடியாமல் இருந்தது.
இந்த தகவல் சமூக வலைத்தளங்களில் பரவியதைத் தொடர்ந்து, அமெரிக்க நாடாளுமன்றத்தின் ஜனநாயகக் கட்சித் தலைவர் ஹக்கீம் ஜெப்ரிஸ், வெளியுறவுத்துறை அமைச்சர் மார்கோ ரூபியோவிடம் பேசி, வோசின்ஹாவின் தாய்க்கு உடனடியாக விசா வழங்க நடவடிக்கை எடுக்குமாறு கோரிக்கை விடுத்தார்.
"தன் மகன் வரலாறு படைப்பதை நேரில் காணும் வாய்ப்பை எந்தத் தாயும் இழக்கக் கூடாது" என்று ஹக்கீம் ஜெப்ரிஸ் தெரிவித்தார்.
2026 உலகக் கோப்பை
இதையடுத்து, விசா தொடர்பான அனைத்து கட்டணங்களும் ரத்து செய்யப்பட்டு, புதன்கிழமை அவருக்கு அவசர விசா வழங்கப்பட்டது.
மேலும், ஞாயிற்றுக்கிழமை மியாமியில் நடைபெறவுள்ள உருகுவே அணிக்கு எதிரான கேப் வெர்டே அணியின் இரண்டாவது லீக் ஆட்டத்தைக் காண தேவையான அனைத்து பயண ஏற்பாடுகளையும் அமெரிக்க வெளியுறவுத்துறை மேற்கொண்டுள்ளது.
கேப் வெர்டே தலைநகர் பிரையாவில் உள்ள அமெரிக்க விசா அதிகாரிகள், வோசின்ஹாவின் தாயை நேரில் சந்தித்து அனைத்து நடைமுறைகளையும் விரைவாக நிறைவு செய்தனர்.
40 வயதில் தனது முதல் உலகக் கோப்பை தொடரில் விளையாடி வரும் வோசின்ஹாவுக்கு, ஞாயிற்றுக்கிழமை நடைபெறும் போட்டியில் அவரது தாய் நேரில் இருந்து ஆதரவளிக்க உள்ளார். இது 2026 உலகக் கோப்பை தொடரின் மிகவும் நெகிழ்ச்சியான தருணங்களில் ஒன்றாகப் பார்க்கப்படுகிறது.
சுழிபுரம், பிரித்தானியா, United Kingdom, மானிப்பாய், கொழும்பு, Uganda
02 Aug, 2016
யாழ். அத்தியடி, யாழ்ப்பாணம், London, United Kingdom, மெல்போன், Australia
29 Jul, 2026
