மீன் ஏற்றுவதற்காக அனுப்பப்பட்ட பேருந்து இப்போது பயணிகள் சேவையில்..! யாழில் முன்வைக்கப்பட்டுள்ள குற்றச்சாட்டு

முன்னாள் அமைச்சர் டக்ளஸ் தேவானந்தா அமைச்சராகவிருந்த காலப்பகுதியில் மீன் ஏற்றுவதற்காக அனுப்பப்பட்ட பேருந்துகளே இப்போதும் வடமராட்சி கிழக்கில் சேவையில் ஈடுபடுவதாக பருத்தித்துறை பிரதேசசபை உறுப்பினர் பி.அலஸ்ரன் தெரிவித்துள்ளார்.

அரச பேருந்துகள் தொடர்ச்சியாக பழுதடைவதால் பயணிகள் பாதிக்கப்படுவது தொடர்பாக கருத்து தெரிவித்த போதே மேற்கண்டவாறு தெரிவித்தார்.

அவர் தொடர்ந்தும் கருத்து தெரிவிக்கையில், "யாழ்ப்பாணம் வடமராட்சி கிழக்கு மக்கள் அரச பேருந்தை நாளாந்தம் தள்ளித்திரிந்து இயக்கி பயணம் மேற்கொள்கின்றனர்.

காலை 06.00 கட்டைக்காட்டில் இருந்து யாழ்ப்பாணம் நோக்கி பயணிக்கும் அரச பேருந்தை பழுது காரணமாக சில நாட்களாக மாணவர்கள், மக்கள் சேர்ந்து தள்ளித்திரிந்து ஸ்ராட் பண்ணும் சம்பவம் இடம்பெறுகின்றது.

தொடர் சிரமங்கள்.. 

மக்கள் தள்ளியும் பேருந்து இயங்காது போனால் சம நேரத்தில் பருத்தித்துறைக்கு பயணிக்கும் அரச பேருந்தால் குறித்த பேருந்து கட்டி இழுக்கப்பட்டு ஸ்ராட் செய்யப்படுகின்றது.

கடந்த வெள்ளிக்கிழமை காலை 06.00 மணிக்கு வழமை போன்று பாடசாலை மாணவர்களோடு பொதுமக்கள் குறித்த பேருந்தை தள்ளி இயக்க முயன்றபோது பேருந்து இயங்கவில்லை.

பின்பு பருத்தித்துறை நோக்கி பயணிக்கவிருந்த அரச பேருந்து மூலம் கட்டி இழுத்து இயக்க முயன்ற வேளையும் பேருந்து இயங்கவில்லை.

இதனால் காலை 06.00 மணிக்கு கட்டைக்காட்டில் இருந்து யாழ்ப்பாணம் நோக்கி பயணிக்கும் அரச பேருந்து பயணிக்காததால் மாணவர்கள், அரச உத்தியோகத்தர்கள் என பலரும் பாதிப்படைந்தனர்.

வடமராட்சி கிழக்கில் சேவையிலீடுபடும் அரச பேருந்துகள் மிக பழமையானது, முன்னாள் அமைச்சர் டக்ளஸ் தேவானந்தா அமைச்சராக இருந்த காலத்தில் மீனை ஏற்றி செல்வதற்காக விடப்பட்ட பேருந்துகள் இவை.

தரமற்ற பேருந்துகளால் வடமராட்சி கிழக்கு மக்கள் தொடர்ந்தும் சிரமத்தை எதிர்கொண்டு வருகின்றனர். இவ்வாறான அடிப்படை தேவைகளை பூர்த்தி செய்யுமாறுதான் நாம் கேட்கின்றோம்.

அதனைவிடுத்து மக்கள் விரும்பாத மசாஜ் நிலையங்களை கொண்டுவர துடிக்கிறார்கள். சமூகத்தை சீரழிக்கும் மசாஜ் நிலையம் போன்ற அபிவிருத்திகளை செய்வதற்கு ஆர்வம் காட்டுவதை விடுத்து ரஜீவன் எம்பி போன்றவர்கள் மக்கள் கேட்கும் தரமான பேருந்து சேவையை வளங்க வழி செய்ய வேண்டும்" என தெரிவித்தார்.

2032ஆம் ஆண்டளவில் இலங்கையில் ஏற்படவுள்ள மாற்றம்! வட மாகாண ஆளுநர் கூறும் விடயம்

மணல் திட்டில் சிக்கித் தவித்த 11 இலங்கை ஏதிலிகள் - அதிரடியாக மீட்ட கடற்படையினர்