பரபரப்பை ஏற்படுத்தியுள்ள பேருந்து விபத்து.. 10 பாடசாலை மாணவர்கள் வைத்தியசாலையில்

புதிய இணைப்பு

ஹபராதுவை - கொக்கல பகுதியில் இடம்பெற்ற விபத்தில் காயமடைந்த சிறுவர்களின் எண்ணிக்கை 10 ஆக உயர்ந்துள்ளது.

பாதிக்கப்பட்ட சிறுவர்கள் சிகிச்சைக்காக கராப்பிட்டிய மற்றும் உனவட்டுன வைத்தியசாலைகளில் அனுமதிக்கப்பட்டுள்ளதாக பொலிஸார் தெரிவித்துள்ளனர்.

பெலியத்தையில் இருந்து மருதானை நோக்கிப் பயணித்த தொடருந்தில் குறித்த பேருந்தின் பின்பகுதி மோதியதில் இந்த விபத்து சம்பவித்துள்ளது.

கைது

மேலதிக வகுப்பு ஆசிரியர்கள் மற்றும் பெற்றோருடன் இந்த சிறுவர்கள் கொட்டாவ பகுதியிலிருந்து கொக்கலையில் அமைந்துள்ள மார்ட்டின் விக்கிரமசிங்க நினைவு அருங்காட்சியகத்தைப் பார்வையிடச் சென்று திரும்பிக்கொண்டிருந்த போதே இந்த விபத்து நேர்ந்துள்ளது.

விபத்து இடம்பெற்ற சந்தர்ப்பத்தில் மேலதிக வகுப்பு ஆசிரியர்கள் 14 பேர், பெற்றோர்கள் 6 பேர் மற்றும் சிறுவர்கள் 41 பேர் வரை பேருந்தில் இருந்ததாக இதுவரை மேற்கொள்ளப்பட்ட விசாரணைகளில் தெரியவந்துள்ளது.

பேருந்தில் இருந்த சிறுவர்கள் 14 மற்றும் 15 வயதுடையவர்கள் என தகவல்கள் தெரிவிக்கின்றன.

விபத்து நடந்த தொடருந்து கடவையில் பாதுகாப்பு கடவை (Gate) இல்லாததுடன், மின்சார விளக்கு சமிக்ஞை மற்றும் ஒலிச் சமிக்ஞை மூலமாக மட்டுமே இயங்கும் ஒரு இடம் என குறிப்பிடப்பட்டுள்ளது.

மேலும், இந்த விபத்து தொடர்பில் 40 வயதுடைய பஸ் சாரதியும் 21 வயதுடைய நடத்துனரும் கைது செய்யப்பட்டுள்ளனர்.

முதலாம் இணைப்பு

காலி- ஹபராதுவை பகுதியில் பேருந்து ஒன்று தொடருந்துடன் மோதி விபத்துக்குள்ளாகியுள்ளதாக பொலிஸார் தெரிவித்துள்ளனர்.

குறித்த விபத்தானது இன்று(25.10.2026) கொக்கல மார்ட்டின் விக்கிரமசிங்க அருங்காட்சியகத்திற்கு அருகில் இடம்பெற்றுள்ளது.

இந்த விபத்தில் காயமடைந்த 6 பேர் வைத்தியசாலையில் அனுமதிக்கப்பட்டுள்ளதுடன் அவர்களில் மூவரின் நிலைமை கவலைக்கிடமாக உள்ளதாகவும் தெரிவிக்கப்படுகின்றது.

மேலதிக விசாரணை

தொடருந்து கடவை ஒன்றைக் கடந்து செல்ல முற்பட்டபோதே பேருந்தும், தொடருந்தும் மோதி விபத்துக்குள்ளாகியுள்ளன.

விபத்து தொடர்பான மேலதிக விசாரணைகளை பொலிஸார் மேற்கொண்டு வருகின்றனர்.

மின்சாரப் பேருந்துகள் கொள்வனவு திட்டத்தில் அரசாங்கம் அசமந்தப்போக்கு

திருகோணமலை- சாம்பல்தீவு பகுதியில் விபத்து: ஒருவர் பலி