ஊழல் மோசடிகள் நிரூபிக்கப்பட்டால் பதவி விலகுவேன்: பந்துல சூளுரை

அரச தொலைக்காட்சி அலைவரிசையின் ஒளிபரப்பு நேர ஒதுக்கீட்டில் ஊழல் மோசடிகள் இடம்பெற்றுள்ளதாக நிரூபிக்கப்பட்டால் தனது பதவியை இராஜினாமா செய்வதாக வெகுஜன ஊடக, போக்குவரத்து மற்றும் நெடுஞ்சாலைகள் அமைச்சர் கலாநிதி பந்துல குணவர்தன தெரிவித்துள்ளார்.

நாடாளுமன்றில் இன்று (22.08.2023) தேசிய மக்கள் சக்தியின் தலைவர் அனுரகுமார திஸாநாயக்கவினால் நிலையியற் கட்டளை 27(2)இன் கீழ் எழுப்பப்பட்ட கேள்விக்கு பதிலளிக்கும் போதே அமைச்சர் மேற்கண்டவாறு தெரிவித்தார்.

மேலும் தெரிவிக்கையில்,  இந்த விடயத்தை முன்வைப்பதற்கு சந்தர்ப்பம் வழங்கிய அநுரகுமார திஸாநாயக்கவிற்கு நன்றியை தெரிவித்துக்கொள்கின்றேன்.

புரிந்துணர்வு ஒப்பந்தம்

இந்த அலைவரிசை எந்த நிறுவனத்திற்கும் விற்கப்படவில்லை. குத்தகைக்கும் விடப்படவில்லை.

ஆறு மாதங்களுக்கு குத்தகை அடிப்படையில் மாதத்திற்கு 150 மில்லியன் வாடகைக்கு வி.ஐ.எஸ் பிராட்காஸ்டிங் நிறுவனத்திற்கு ஒளிபரப்பு நேரம் குத்தகைக்கு விடப்பட்டுள்ளது.

நான் எந்த சட்டவிரோத விடயத்தையும் இங்கு அறிவுறுத்தவில்லை. எனக்கு சட்டப்பூர்வ அதிகாரம் இருப்பதால் இது அங்கீகரிக்கப்பட்டது. கையெழுத்திட்ட ஒப்பந்தம் தாக்கல் செய்யப்படுகிறது.

நீங்கள் இப்போது புரிந்துணர்வு ஒப்பந்தத்தை சரிபார்க்கலாம். இதனை நாம் அமைச்சரவையில் முன்வைத்த போது, இது அமைச்சரவைக்கு கொண்டு வரப்பட வேண்டிய விடயம் அல்ல என ஜனாதிபதி தெரிவித்தார். பணிப்பாளர் சபைக்கு தொழில் நடத்த உரிமை உண்டு என்றார்.

166 கோடி ரூபாய் இழப்பு

2018-ம் ஆண்டு முதல் தொலைக்காட்சி நிறுவனம் சிக்கலில் உள்ளது. இந்த முழு காலகட்டத்திலும் 166 கோடி ரூபாய் இழப்பு ஏற்பட்டுள்ளது.

இந்த நிறுவனத்தால் கடைசியில் மின் கட்டணத்தைகூட செலுத்த முடியாத நிலை காணப்பட்டது. தேசிய தொலைக்காட்சிக்கு கூட மின்வெட்டை நிறுத்த வழியில்லாத சூழ்நிலை காணப்படுகின்றது.

இழப்புக்கான தொகையைப் பெற்றவுடன் நான் முதலில் செய்த வேலை மின்கட்டணத்தை செலுத்தியதுதான். மேலும் அதில் மாநகராட்சிக்கு 75 மில்லியன் செலுத்தப்பட்டது. நீங்கள் அதை செய்யவில்லை என்றால், அது நின்றுவிடும். மோசடி, ஊழல் இருந்தால் நீதிமன்றத்தை நாடலாம். அப்படி நடந்தது நிரூபிக்கப்பட்டால் பதவி விலகுவேன்.” என தெரிவித்துள்ளார்.