பசில் ராஜபக்சவைக் கைது செய்ய திறந்த பிடியாணை உத்தரவு..!

முன்னாள் அமைச்சர் பசில் ராஜபக்சவைக் கைது செய்ய மாத்தறை நீதவான் நீதிமன்றம் பிடியாணை பிறப்பித்துள்ளது.

பிரவுன்ஸ் ஹில் நில வழக்கு தொடர்பாக நிதிக்குற்றப் புலனாய்வுப் பிரிவு (FCID) நீதிமன்றத்தில் அறிக்கை சமர்ப்பித்த பின்னர் இன்று(27.10.2026)  இந்த உத்தரவு பிறப்பிக்கப்பட்டது.

சொத்து முடக்கம்

இந்த சம்பவம் தொடர்பில் மேலும் தெரியவருகையில், 

முன்னாள் அமைச்சர் பசில் ராஜபக்சவுடன் தொடர்புடையதாகக் கூறப்படும் மாத்தறை பிரவுன்ஸ் ஹில் பகுதியில் உள்ள சொத்தின் பயன்பாட்டை இடைநிறுத்துவதற்கு பணச்சுத்திகரிப்பு எதிர்ப்புச் சட்டத்தின் கீழ் அதிகாரிகள் நடவடிக்கை எடுத்துள்ளதாக நீதிமன்றத்தில் தெரிவிக்கப்பட்டுள்ளது.

குற்றப்புலனாய்வுத் திணைக்களத்தின் நிதிக்குற்றப் புலனாய்வுப் பிரிவு, மாத்தறை நீதிவான் சத்துர திசாநாயக்க முன்னிலையில் தாக்கல் செய்த நகர்த்தல் பத்திரத்தின் மூலம் இதனை நீதிமன்றத்திற்கு அறிவித்துள்ளது.

சட்டவிரோதமாக ஈட்டப்பட்டதாகக் கூறப்படும் பணத்தை பயன்படுத்தி, பிரவுன்ஸ் ஹில் பகுதியில் சுமார் ஒன்றரை ஏக்கர் காணி கொள்வனவு செய்யப்பட்டதாக முன்வைக்கப்பட்டுள்ள குற்றச்சாட்டு தொடர்பிலேயே இந்த வழக்கு விசாரணை நடைபெற்று வருகின்றது.

இதேவேளை, வழக்கு விசாரணைகளுக்காக நீதிமன்றத்தில் முன்னிலையாகாதமை தொடர்பில் பசில் ராஜபக்சவுக்கு எதிராக இன்டர்போல் நடவடிக்கைகளும் முன்னெடுக்கப்பட்டுள்ளதாக தெரிவிக்கப்பட்டுள்ளது.

நீல அறிவித்தல்

சர்வதேச பொலிஸ் அமைப்பான இன்டர்போலின் “நீல அறிவித்தல் (Blue Notice)” பொதுவாக ஒரு விசாரணையுடன் தொடர்புடைய நபரின் இருப்பிடம், அடையாளம் அல்லது நடவடிக்கைகள் தொடர்பான மேலதிக தகவல்களைப் பெறுவதற்காகப் பயன்படுத்தப்படுகிறது. இது சர்வதேச கைது உத்தரவு அல்ல.

இந்நிலையில், பஷில் ராஜபக்ஷ தொடர்பான இன்டர்போல் நடவடிக்கையின் துல்லியமான நிலை குறித்து ஊடக அறிக்கைகளில் வேறுபாடுகள் காணப்படுகின்றன. சில அறிக்கைகள் நீல அறிவித்தல் வெளியிடப்பட்டுள்ளதாக தெரிவிக்கின்ற நிலையில், ஏனைய அறிக்கைகள் அதற்கான கோரிக்கை முன்வைக்கப்பட்டு, மேலதிக தகவல்கள் கோரப்பட்டுள்ளதாக தெரிவிக்கின்றன.

மேலும், இந்த வழக்கில் நீதிமன்றத்தில் முன்னிலையாக தவறியமை காரணமாக பசில் ராஜபக்சவின் பிணைப் பணத்தைப் பறிமுதல் செய்ய நீதிமன்றம் கடந்த ஆகஸ்ட் 18 ஆம் திகதி உத்தரவிட்டிருந்ததாகவும் தெரிவிக்கப்பட்டுள்ளது.

பிரவுன்ஸ் ஹில் சொத்து தொடர்பான வழக்கு அடுத்ததாக 2026 ஒக்டோபர் 27ஆம் திகதி விசாரணைக்கு எடுத்துக்கொள்ளப்பட்ட நிலையில், இன்று(27) திறந்த பிடியாணை உத்தரவு பிறப்பிக்கப்பட்டுள்ளது. 

ஷிரந்தி ராஜபக்சவுக்கு திறந்த இதய அறுவை சிகிச்சை!

கிரிஷ் வழக்கில் நாமலின் புதிய நகர்வு..! ஆதாரங்களை நாளை சமர்ப்பிக்க நீதிமன்றம் உத்தரவு