பொத்துவில் - பொலிகண்டி வரையான பேரணிக்கு ஆயிரக்கணக்கில் பெருகும் மக்கள் ஆதரவு! சர்வதேச ஊடகம் தகவல்

பல்வேறு அச்சுறுத்தல்கள் மற்றும் மிரட்டல்கள் இருந்த போதிலும் பொத்துவில் - பொலிகண்டி வரையான தமிழரின் நீதிகோரிய பயணம் கிளிநொச்சி நகரை வந்தடைந்துள்ளதாக சர்வதேச ஊடகம் EINPRESSWIRE செய்தி வெளியிட்டுள்ளது.

மட்டக்களப்பு, திருகோணமலை, வவுனியா, முல்லைத்தீவு மற்றும் மன்னார் மற்றும் அதன் இறுதி இடமான பொலிகண்டியை அடைவதற்கு முன்னர் குறித்த பேரணி 7ம் திகதி யாழ்ப்பாண நகரத்திற்குள் வந்தடையும் என அந்த செய்தியில் சுட்டிக்காட்டப்பட்டுள்ளது.

இந்த பேரணியானது முற்றிலுமாக சிவில் சமூக அமைப்புகளினால் ஒழுங்கு செய்யப்பட்டுள்ளதாக அந்த செய்தியில் வலியுறுத்தப்பட்டுள்ளது.

இந்நிலையில், குறித்த பேரணிக்கு நாளுக்கு நாள் மக்களின் ஆதரவு பெருகி வருவதுடன், பேரணியில் ஆயிரக்கணக்கான மக்கள் இணைந்துள்ளதாக அந்த செய்தியில் மேலும் தெரிவிக்கப்பட்டுள்ளது.

இதேவேளை, இந்த பேரணி பின்வரும் விடயங்களை முன்னிலைப்படுத்தி மேற்கொள்ளப்படுகின்றமை குறிப்பிடத்தக்கது,

• தமிழர்களின் கோவில்களை அழித்த பின்னர் பௌத்த விகாரைகளை நிறுவுவதன் மூலம் தமிழ் பகுதிகளில் நில அபகரிப்பு மற்றும் தமிழின் பாரம்பரிய, வரலாற்று இடங்களை சிங்கள பகுதிகளாக மாற்றுவது.
• கொரோனா தொற்று காரணமாக உயிரிழந்த முஸ்லிம்கள் குடும்பங்களின் விருப்பத்திற்கு எதிராகவும், இஸ்லாமிய போதனைகளுக்கு எதிராகவும் தகனம் செய்யப்படுகிறார்கள்.
• மலையகத்தில் உள்ள தமிழர்கள் 1,000 ரூபாய் சம்பள உயர்வுக்கு நீண்ட காலமாக கோரிக்கை விடுத்து வருகின்றனர். எனினும் அவர்களின் கோரிக்கைகளுக்கு அரசாங்கம் பதிலளிக்கவில்லை.
• யுத்தம் முடிவடைந்ததிலிருந்து, தமிழ் பகுதிகளின் இராணுவமயமாக்கல் தொடர்கிறது, சிங்கள மக்களுக்கு ஆதரவாக தமிழர்களின் வரலாற்று அடையாளம் அழிக்கப்படுகிறது, தமிழர் பகுதியில் தொடர்ந்து நடைபெற்றும் சிங்கள குடியேற்றங்கள்.
• தமிழ் கால்நடை உரிமையாளர்கள் ஏராளமான பிரச்சினைகளை எதிர்கொள்கின்றனர், அவர்கள் வசிக்கும் பகுதிகள் சிங்களவர்களால் ஆக்கிரமிக்கப்பட்டு அவர்களின் கால்நடைகள் கொல்லப்படுகின்றன.
• தமிழ் இளைஞர்களை குற்றச்சாட்டு அல்லது விசாரணையின்றி சிறையில் அடைக்க பயங்கரவாத தடைச்சட்டம் பயன்படுத்தப்பட்டு வருகிறது, இப்போது முஸ்லிம்களுக்கு எதிராக பயன்படுத்தப்படுகிறது.
• தமிழ் அரசியல் கைதிகள் பல ஆண்டுகளாக விசாரணையின்றி சிறையில் அடைக்கப்பட்டுள்ளனர். சிங்களவர்களுக்கு அரசாங்கம் தவறாமல் மன்னிப்பு வழங்கியுள்ளது, ஆனால் தமிழ் அரசியல் கைதிகளுக்கு மன்னிப்பு வழங்கப்படவில்லை.
• காணாமல் போனவர்களின் குடும்பங்கள் தங்களது அன்புக்குரியவர்களைக் கண்டுபிடிக்க எதிர்ப்புத் தெரிவித்து வருகின்றன, ஆனால் அரசாங்கம் அவர்களுக்கு பதில் அளிக்க மறுக்கிறது.
• தமிழர்கள் போரின் போது கொல்லப்பட்ட தங்கள் உறவுளை நினைவுகூரும் உரிமை மறுக்கப்பட்டுள்ளனர், இது நினைவு நிகழ்வுகளை மறுப்பதன் மூலமும், இறந்தவர்களின் கல்லறைகளை அழிப்பதன் மூலமும், நினைவுச் சின்னங்களை இடிப்பதன் மூலமும் நிரூபிக்கப்பட்டுள்ளது.
• இந்த முறைகேடுகளை வெளிக்கொண்டுவரும் தமிழ் ஊடகவியலாளர்களையும்,இந்த முறைகேடுகளை எதிர்க்கும் தமிழ் சமூக ஆர்வலர்களையும் அரசாங்கம் குறிவைக்கிறது என மேலும் தெரிவிக்கப் பட்டுள்ளது.