இலங்கை வரும் வெளிநாட்டவர்கள் தொடர்பில் அவதானமாக செயற்படுமாறு எச்சரிக்கை

இலங்கை வரும் வெளிநாட்டவர்களால் மோசடி செய்யும் நடவடிக்கை அதிகரித்துள்ளமையினால் அவர்கள் தொடர்பில் அவதானமாக செயற்படுமாறு எச்சரிக்கை விடுக்கப்பட்டுள்ளது.

பல்லேபெத்த நகரில் உள்ள ஒரு கடையில் நடந்த ஒரு நுட்பமான பண மோசடி குறித்து வர்த்தகர் ஒருவர் கொடகவெல பொலிஸாரிடம் முறைப்பாடு செய்துள்ளார்.

வெளிநாட்டு தம்பதியினால் நுட்பமாக மேற்கொள்ளப்பட்ட இந்த மோசடி, கடையின் பாதுகாப்பு கமரா அமைப்பில் பதிவாகியுள்ளதாக வர்த்தகர் குறிப்பிட்டுள்ளார்.

வெளிநாட்டு தம்பதி

முறைப்பாட்டாளரின் தகவலுக்கமைய, வெளிநாட்டு தம்பதியினர் கடைக்கு வந்து, ஒரு பொருளை கொள்வனவு செய்து, 5,000 ரூபாய் பணத்தாள் ஒன்றை கொடுத்து பணம் செலுத்தியுள்ளனர்.

மீதமுள்ள பணத்தைப் பெற்ற பிறகு, வாங்கிய பொருள் தங்களுக்கு தேவையில்லை என்று கூறி, அதைத் திருப்பிக் கொடுத்து, மீளவும் அந்த 5,000 ரூபாய் பணத்தாளை திருப்பிக் கேட்கிறார்கள்.

பின்னர் அவர்கள் வேறொரு பொருளை தெரிவு செய்து மீதமுள்ள பணத்தை மீண்டும் கேட்கிறார்கள், அவர்கள் பணத்தைக் கொடுக்கவில்லை என்றால், மோசடி செய்ததாகக் குற்றம் சாட்டி கூச்சலிடுகிறார்கள்.

பண மோசடி

பயந்துபோன கடை ஊழியர்கள் மீதமுள்ள பணத்தை வழங்க வேண்டியிருந்தது, மேலும் நாள் முடிவில் பணத்தை எண்ணும்போது இழப்பு ஏற்பட்டமை தெரியவந்தது. கடையின் பாதுகாப்பு கமராக்களை ஆய்வு செய்தபோது, ​​வெளிநாட்டவர் பணப் பெட்டிக்குள் கையை நீட்டி பணம் எடுப்பது தெளிவாகக் காணப்பட்டது.

இந்த செயல்முறை பல சந்தர்ப்பங்களில் மேற்கொள்ளப்பட்டதாகவும், இதனால் சுமார் 15,000 ரூபாய் இழப்பு ஏற்பட்டதாகவும் இது ஒரு சம்பவம் மட்டுமல்ல, இதே போன்ற சம்பவங்கள் அப்பகுதியில் உள்ள பல கடைகளிலும் பதிவாகியுள்ளதாகவும் வர்த்தகர் குறிப்பிட்டுள்ளார்.

இவர்களால் பணத்தாள்களை கொண்டு மேலும் பல மோசடி நடவடிக்கைகள் மேற்கொள்ளப்படுவதாக தெரியவந்துள்ளது.

இரத்தினபுரி, பெல்மடுல்ல, கஹாவத்தை, பல்லேபெத்த, உடவலவே மற்றும் எம்பிலிப்பிட்டிய ஆகிய பகுதிகளில் இந்த வெளிநாட்டு கொள்ளை கும்பல் செயல்பட்டு வருவதாக தெரிவிக்கப்படுகிறது. இதுபோன்ற மோசடி நடவடிக்கைகள் குறித்து குறிப்பாக விழிப்புடன் இருக்குமாறு உள்ளூர் வர்த்தகர்களை எச்சரித்துள்ளனர்.