ராஜபக்சர்களின் மற்றுமொரு மோசடி அம்பலம் - காட்டிக் கொடுத்தார் கோட்டாபய

முன்னாள் ஜனாதிபதி கோட்டாபய ராஜபக்சவின் தனிப்பட்ட செயலாளராக செயற்பட்ட சுகீஸ்வர பண்டாரவுக்கு வழங்கப்பட்டதாக கூறப்படும் சம்பளப் பணம், உண்மையில் கோட்டாபயவின் சகோதரிகளில் ஒருவரின் மகனின் வங்கிக் கணக்கில் வைப்பிலிடப்பட்டதாக விசாரணைகளில் தெரியவந்துள்ளது.

மத்திய புலனாய்வுப் பிரிவு நேற்று(23) கோட்டை நீதவான் நீதிமன்றத்தில் இந்த விடயம் தெரிவித்தது.

இது தொடர்பான வாக்குமூலங்கள் கோட்டாபய ராஜபக்ச மற்றும் குறித்த கணக்கு வைத்திருப்பவர் ஆகிய இருவரிடமிருந்தும் பதிவு செய்யப்பட்டுள்ளதாகவும் அந்த பிரிவு மேலும் குறிப்பிட்டது.

மேலதிக விசாரணை

இந்த விவகாரம் தொடர்பான மேலதிக விசாரணைகள் தற்போது நடைபெற்று வருவதாகவும் குற்றப் புலனாய்வு பிரிவைப் பிரதிநிதித்துவப்படுத்தும் பொலிஸ் அதிகாரி நீதிமன்றத்தில் தெரிவித்தார்.

முன்னாள் ஜனாதிபதி கோட்டாபய ராஜபக்சவின் முன்னாள் தனிப்பட்ட செயலாளரான சுகீஷ்வர பண்டார நேற்று நீதிமன்றத்தில் முன்னிலைப்படுத்தப்பட்ட போது குற்றப் புலனாய்வு பிரிவு இதனைத் தெரிவித்துள்ளது.

முன்னாள் ஜனாதிபதி ரணில் விக்ரமசிங்கவின் கீழ் சிறப்புத் திட்டங்களின் பணிப்பாளர் நாயகமாகப் பணியாற்றிய காலத்தில் 220 மில்லியன் ரூபாய்க்கும் அதிகமான தொகையை குற்றவியல் ரீதியாக தவறாக பயன்படுத்தியமை மற்றும் நம்பிக்கையை மீறியமை ஆகிய குற்றச்சாட்டுகளின் பேரில் அவர் தற்போது விளக்கமறியலில் வைக்கப்பட்டுள்ளார்.

சந்தேகநபர் சார்பில் தாக்கல் செய்யப்பட்ட பிணை மனுவை நிராகரித்த கோட்டை நீதவான் பாசன் அமரசேன, அவரை 7 ஆம் திகதி வரை தொடர்ந்து விளக்கமறியலில் வைக்குமாறு உத்தரவிட்டார்.

சந்தேகநபரான சுகீஷ்வர பண்டாரவின் கணக்கில் நான்கு சந்தர்ப்பங்களில் 5 மில்லியன் ரூபாயும், 79 தனித்தனி சந்தர்ப்பங்களில் 11.4 மில்லியன் ரூபாய்க்கும் அதிகமான தொகையும் வைப்பிலிடப்பட்டதாக மத்திய புலனாய்வுப் பிரிவு மேலதிக அறிக்கை மூலம் நீதிமன்றத்திற்குத் தெரிவித்தது.

கோட்டபாயவிடம் வாக்குமூலம்

சிறப்புத் திட்டத்தில் பணியாற்றிய பலரிடமிருந்து வாக்குமூலங்கள் ஏற்கனவே பதிவு செய்யப்பட்டிருந்தாலும், இன்னும் 50க்கும் மேற்பட்ட வாக்குமூலங்கள் பதிவு செய்யப்பட வேண்டியுள்ளதாக பொலிஸார், குறிப்பிட்டுள்ளனர்.

விசாரணைகள் தொடர்ந்து நடைபெற்று வருவதாகவும் தெரிவித்தனர்.

முன்னாள் ஜனாதிபதி கோட்டாபய ராஜபக்சவின் தனிப்பட்ட செயலாளர் பதவிக்காக ஒதுக்கப்பட்ட சம்பளப் பணம், ராஜபக்சர்களின் சகோதரிகளில் ஒருவரின் மகனின் வங்கிக் கணக்கில் வைப்பிலிடப்பட்டதாக விசாரணைகளில் தெரியவந்துள்ளது.

கோட்டாபய ராஜபக்சவிடமிருந்து பெறப்பட்ட வாக்குமூலங்கள் இத்தகவலை உறுதிப்படுத்தியுள்ளன. கணக்கு வைத்திருப்பவரிடமிருந்து இரண்டு வாக்குமூலங்கள் பதிவு செய்யப்பட்டன.

அவற்றில் ஒன்றில், நிதியில் பாதியைத் தான் பெற்றதாக அந்த நபர் கூறினார், மற்றொன்றில், எந்தப் பணத்தையும் பெறவில்லை என்று கூறினார்.

இவ்விவகாரம் தொடர்பான மேலதிக விசாரணைகள் நடைபெற்று வருகின்றன என பொலிஸார் மேலும் தெரிவித்துள்ளனர்.

உயிர்த்த ஞாயிறு தாக்குதல் விவகாரம்! பின்னணியில் மறைந்துள்ள முக்கிய சூத்திரதாரிகள் உள்ளிட்ட சதியாளர்களின் பட்டியல்

நீதிமன்ற தீர்ப்பை அடுத்து சஹ்ரானுடைய விரல் சைகையை காட்டிய குற்றவாளிகள் : நீதிமன்றத்திற்குள் நடந்தது என்ன...!