இலங்கையில் அதிகரிக்கும் இணைய மோசடிகள்! ஆயிரத்துக்கும் மேற்பட்டோர் கைது

அண்மைக்காலமாக இலங்கையில் இணைய மோசடிகள் குறிப்பிடத்தக்க அளவில் அதிகரித்து வருகின்றமை புள்ளிவிபரங்கள் மூலம் தெரியவந்துள்ளது.

அவ்வாறான இணைய மோசடிகள் அதிகரிப்பு காரணமாக அண்மைக்காலங்களில் ஆயிரத்துக்கும் மேற்பட்டோர் கைது செய்யப்பட்டிருந்தனர்.

இலங்கையில், ஆசியாவைச் சேர்ந்த மோசடிக் கும்பல்களைச் சேர்ந்தவர்கள் பெருமளவில் ஊடுருவியுள்ள நிலையில், இந்த ஆண்டு இதுவரை ஆயிரத்திற்கும் மேற்பட்டோர் கைது செய்யப்பட்டுள்ளனர்.

நிபுணர்கள் எச்சரிக்கை

தென்கிழக்கு ஆசிய நாடுகளிலிருந்து (உதாரணமாக கம்போடியா) தப்பி வரும் ஆயிரக்கணக்கான மோசடி கும்பல் உறுப்பினர்களுக்கு, இலங்கை ஒரு விருப்பமான இடமாக மாறி வருவதாக நிபுணர்கள் எச்சரிக்கின்றனர்.

கம்போடியா போன்ற நாடுகளில், கடத்தப்பட்ட தொழிலாளர்களைக் கொண்டு நடத்தப்படும் மிகப்பெரிய மோசடி மையங்கள் செயல்பட்டு வந்தன.

சமீபகாலமாக தென்கிழக்கு ஆசியாவில் உள்ள இத்தகைய மோசடி மையங்களுக்கு எதிராகக் கடுமையான நடவடிக்கைகள் எடுக்கப்பட்டதால், சீன வம்சாவளியைச் சேர்ந்த மோசடிக் கும்பல்கள், மடகாஸ்கர் முதல் பபுவா நியூ கினியா வரையிலான பலவீனமான நிர்வாகம் கொண்ட நாடுகளுக்குத் தங்கள் செயல்பாடுகளை மாற்றியுள்ளன.

தெற்காசிய நாடுகளில், இலங்கை ஒரு முக்கியமான இடத்தைப் பிடித்துள்ளது. 'தொழில்துறை அளவில் இணைய மோசடிகள் நடக்கும் மையமாக இலங்கை மாறுவதற்கு அதிக அபாயம் உள்ளது' என்று 'குளோபல் இனிஷியேட்டிவ் அகைன்ஸ்ட் டிரான்ஸ்நேஷனல் ஓர்கனைஸ்ட் கிரைம்' (GI-TOC) அமைப்பு கடந்த மாதம் எச்சரித்திருந்தது.

ஜனவரி முதல் செப்டம்பர் வரை, இலங்கை பொலிசார் நாடு முழுவதும் 27 சந்தேகத்திற்கிடமான மோசடி மையங்களில் சோதனைகளை நடத்தி, 1,093 பேரை கைது செய்துள்ளதாக, இலங்கை பொலிஸ் ஊடகப் பேச்சாளர் ஃப்ரெட்ரிக் வூட்லர், 'ஓர்கனைஸ்ட் கிரைம் அண்ட் கரப்ஷன் ரிப்போர்ட்டிங் ப்ராஜெக்ட்' (OCCRP) மற்றும் 'ஆங்கில ஊடகமொன்றுக்கும் தெரிவித்துள்ளார்.

கைதானவர்கள்

இது கடந்த ஆண்டுகளுடன் ஒப்பிடுகையில் மிக அதிகமான எண்ணிக்கையாகும். உதாரணமாக, 2025ஆம் ஆண்டில் 26 பேரும், அதற்கு முந்தைய ஆண்டில் 573 பேரும் கைது செய்யப்பட்டிருந்தனர் என்று உதவி பொலிஸ் அத்தியட்சகர் (ASP) வூட்லர் தெரிவித்துள்ளார்.

இவ்வளவு பேர் கைது செய்யப்பட்டும், இலங்கையைத் தளமாகக் கொண்டு வெளிநாட்டினரை ஏமாற்றியதாகச் சந்தேகிக்கப்படுபவர்களில், இதுவரை ஒருவர் கூட சட்டப்படி தண்டிக்கப்படவில்லை என்று அவர் தெரிவித்தார்.

இதற்கான காரணம் குறித்து விளக்கிய பொலிஸ் ஊடகப் பேச்சாளர், இலங்கையின் தற்போதைய கணினி குற்றங்கள் தொடர்பான சட்டம் (2007ஆம் ஆண்டு இயற்றப்பட்டது) பாதிக்கப்பட்டவர்களின் புகாரின் அடிப்படையில் மட்டுமே வழக்குகளைப் பதிவு செய்ய அனுமதிக்கிறது என்று கூறினார்.

மோசடிக்கு ஆளானவர்களில் பெரும்பாலோர் வெளிநாடுகளில் வசிப்பதால், மிகக் குறைவான புகார்களே கிடைக்கப்பெற்றுள்ளன. இதன் விளைவாக, கைது செய்யப்பட்ட மோசடி கும்பல் உறுப்பினர்கள் மீது, பாதிக்கப்பட்டவர்களை ஏமாற்றிய குற்றத்திற்காக வழக்கு தொடர்வதற்குப் பதிலாக, விசா விதிமுறைகளை மீறிய குற்றச்சாட்டுகளே சுமத்தப்பட்டு, அவர்கள் நாட்டிலிருந்து வெளியேற்றப்படுகின்றனர் என்று அவர் மேலும் தெரிவித்தார்.

'இலங்கையிலிருந்து இத்தகைய குற்றவியல் வலைப்பின்னல்களை முற்றிலுமாக ஒழிப்பதில் தற்போதைய அரசாங்கம் மிகுந்த ஆர்வம் கொண்டுள்ளது' என்று உதவி பொலிஸ் அத்தியட்சகர் (ASP) வூட்லர் தெரிவித்தார்.

கொண்டுள்ள கடவுச்சீட்டுகள்

இலங்கை பொலிஸ் சைபர் குற்றப்பிரிவின் பணிப்பாளரான சந்திம அருமப்பெரும செய்தியாளர்களிடம் கூறுகையில், இதுவரை கைது செய்யப்பட்ட சந்தேக நபர்களில் பெரும்பாலோர் சீனா, வியட்நாம், இந்தியா மற்றும் இந்தோனேசியா போன்ற ஆசிய நாடுகளின் கடவுச்சீட்டுகளைக் கொண்டுள்ளனர் என்று தெரிவித்தார்.

இவர்களில் பலர் கம்போடியா அல்லது மியான்மர் ஆகிய நாடுகளுக்குச் சென்று வந்ததற்கான பயண ஆவணங்களைக் கொண்டுள்ளனர்; இந்த நாடுகள் மோசடி நடவடிக்கைகளின் மையங்களாக அறியப்படுபவை என்று அவர் மேலும் கூறினார்.

சந்தேக நபர்களிடம் விசாரணை நடத்துவதில் மொழித் தடைகள் பெரும் சவாலாக உள்ளன. மேலும், அவர்கள் பயன்படுத்தும் மின்னணு சாதனங்கள் பெரும்பாலும் குறியாக்கப்பட்டு (encrypted) இருப்பதால், அவற்றை ஆய்வு செய்வது கடினமாக உள்ளது என்று உதவி பொலிஸ் அத்தியட்சகர் அருமப்பெரும தொடர்ந்தும் குறிப்பிட்டார்.

'ஒவ்வொரு சோதனையின்போதும் கைப்பற்றப்படும் சாதனங்களின் எண்ணிக்கை மிக அதிகம் - பொதுவாக சுமார் 200 அலைபேசிகள் மற்றும் மடிக்கணினிகள் கிடைக்கின்றன. இவற்றை முழுமையாக ஆய்வு செய்வதற்குத் தேவையான வளங்கள் எங்களிடம் இல்லை' என்று அவர் கூறினார்.

இதனுடன் மற்றொரு சிக்கலும் இணைந்துள்ளது; இலங்கை தற்போது கடுமையான அந்நியச் செலாவணி நெருக்கடியில் உள்ளது. சுற்றுலாத்துறையை பெரிதும் நம்பியிருக்கும் இலங்கை, சீனா உட்பட 40 நாடுகளைச் சேர்ந்தவர்களுக்கு விசா இல்லா பயண வசதியை வழங்கியுள்ளது.

மேலும், இணைய சூதாட்டம் மற்றும் நேரடி சூதாட்ட விடுதிகளில் முதலீடுகளை அனுமதித்துள்ளதுடன், டிஜிட்டல் பொருளாதாரத் துறையில் முதலீட்டாளர்களை ஈர்க்கும் நோக்கில் 'கொழும்பு துறைமுக நகரம்' (Colombo Port City) எனும் 'சிறப்புப் பொருளாதார மண்டலத்தையும்' உருவாக்கியுள்ளது.

'இலங்கையில் இணைய சூதாட்டம் மற்றும் வெளிநாட்டு சூதாட்ட நடவடிக்கைகள் சட்ட ரீதியாக தெளிவற்ற ஒரு சாம்பல் பகுதியில் இயங்குகின்றன.

குற்றச்செயல்கள்

பொருளாதார நெருக்கடியில் சிக்கியுள்ள 'கொழும்பு துறைமுக நகரம்' போன்ற திட்டங்கள் ஒருபுறம் இருக்க, மறுபுறம் பெருமளவிலான வெளிநாட்டினரை நாட்டிற்குள் கொண்டுவருவதற்கான வழிமுறைகளும் உள்ளன' என்று நாடுகடந்த குற்றங்கள் குறித்த நிபுணரான ஜேசன் டவர் தெரிவித்தார்.

தென்கிழக்கு ஆசியாவில் உள்ள மோசடி மையங்களில், அரசியல்வாதிகள் மற்றும் ஆயுதக் குழுக்களின் பாதுகாப்போடு இத்தகைய குற்றச் செயல்கள் வெளிப்படையாக நடைபெறுகின்றன.

ஆனால் இலங்கையில் இந்த மோசடித் தொழில் இன்னும் மறைமுகமாகவே நடைபெறுகிறது. இருப்பினும், இந்த வலைப்பின்னல்களைக் கட்டுப்படுத்தத் தவறினால், இந்தத் தொழில் வளர்ந்து, அரசாங்கத்தையே எதிர்க்கும் அளவுக்குக் குற்றவாளிகள் சக்திவாய்ந்தவர்களாக மாறக்கூடும் என்று ஜேசன் டவர் எச்சரித்தார்.

'இது எந்த அளவுக்கு வேண்டுமானாலும் வளரக்கூடும். மறைமுகமாக, ரகசியமாக நடக்கும் இந்தச் செயல்கள், காலப்போக்கில் வெளிப்படையான மற்றும் அப்பட்டமான ஒன்றாக மாற வாய்ப்புள்ளது' என்று அவர் கூறினார்.

'தற்போதைய நிலையில், இலங்கை ஒரு முக்கியமான கட்டத்தில் (threshold) உள்ளது.' இணையவழி மோசடிகளை கட்டுப்படுத்துவதில் இலங்கை மேற்கொள்ளப் போகும் நடவடிக்கைகளே இந்தத்துறையின் மோசடிகளில் இருந்து இலங்கையைப் பாதுகாக்கப் போகின்றதா? இல்லை இலங்கையின் பெயரை சர்வதேசத்தில் நாசம் செய்யப் போகின்றதா என்பதைப் பொறுத்திருந்துதான் பார்க்கவேண்டும்.  

சிறையில் இருந்த அமைச்சருக்கு பிரியாணி அனுப்பிய மைத்திரி - ரணில் அரசாங்கம்

வங்காள விரிகுடாவில் உருவாகும் ஆழ்ந்த காற்றழுத்த தாழ்வு மையம்