கப்பலில் ஏற்பட்ட தீ குறித்து ஆய்வு செய்ய நாடாளுமன்ற தேர்வு குழுவை அமைக்குமாறு ரணில் கோரிக்கை

எக்ஸ்-பிரஸ் பேர்ல் கப்பலில் ஏற்பட்ட தீ குறித்து ஆய்வு செய்ய நாடாளுமன்ற தேர்வுக்குழுவை அமைக்குமாறு முன்னாள் பிரதமரும், ஐக்கிய தேசியக்கட்சியின் தலைவருமான ரணில் விக்ரமசிங்க கோரிக்கை விடுத்துள்ளார்.

கடந்த மே 19 ஆம் திகதி இரவு கொழும்பு துறைமுகத்திற்கு வெளியில் கப்பல் வந்தது. மே 20 ஆம் திகதி இலங்கையின் குழுவினர் கப்பலுக்குள் பிரவேசித்தனர் .

கப்பலில் சேமித்து வைக்கப்பட்டிருக்கும் ரசாயனங்கள் அடங்கிய கொள்கலன் பெட்டிகளில் தீ ஏற்பட்டிருப்பதை அவர்கள் அறிந்திருந்தார்கள்.

மே மாதம் 25 ஆம் திகதி கடல் சுற்றுச்சூழல் பாதுகாப்பு ஆணையம் (MEPA) இந்த பகுதி ஆபத்தில் இருப்பதாகச் சர்வதேச கடல்சார் அமைப்புக்கு (IMO) தெரிவித்திருந்தது என்று விக்ரமசிங்க குறிப்பிட்டுள்ளார்.

"எக்ஸ்-பிரஸ் பேர்ல் கப்பல் கொழும்பு துறைமுகத்திற்குள் பிரவேசித்த போது வெடிப்பு நடந்திருந்தால், சேதம் மோசமாக இருந்திருக்கும். இது கொழும்பு துறைமுகத்திலிருந்து ஷங்க்ரி-லா ஹோட்டல் வரையிலான அனைத்து கட்டிடங்களையும் அழித்திருக்கக்கூடும் என்று ஐக்கிய தேசிய கட்சியின் தலைவர் சுட்டிக்காட்டியுள்ளார்.

"கடல் சூழல் பாதுகாப்பு ஆணையம் கடல் சுற்றுச்சூழலைச் சேதப்படுத்தும் அபாயம் இருப்பதாக எச்சரித்திருந்தது. இதன்போது " அடுக்கு II "பேரழிவு என்று அதனை ஆணையகம் குறிப்பிட்டது. இதன் பொருள் -இலங்கையால் நெருப்பைக் கட்டுப்படுத்துவது கடினம் எனவே அதற்கு வெளி உதவி தேவைப்படுகிறது என்பதாகும்.

ஆணையகம் சர்வதேச கடல்சார் அமைப்பின் உதவி தேவை என்று அறிவித்த போதிலும், இலங்கை அரசாங்கம் சர்வதேச உதவியைக் கோரவில்லை, என்று விக்ரமசிங்க கோடிட்டுக் காட்டியுள்ளார்.

இந்தநிலையில் மே 20 முதல் மே 25 வரை அரசாங்கம் ஏன் தற்போதுள்ள சட்டங்களை அமல்படுத்தவில்லை என்பது மிக முக்கியமான கேள்வியாகும் என ரணில் குறிப்பிட்டுள்ளார். இதுபோன்ற சூழ்நிலையில் தேசிய அனர்த்த பேரவையை அனர்த்த முகாமை சட்டத்தின் கீழ் கூட்டியிருக்க முடியும். இது கடலோர பிராந்தியத்தில் பேரழிவு நிலையை ஒன்றுகூடி அறிவிக்கும் ஆற்றலைக் கொண்டிருந்தது என்று அவர் தெரிவித்துள்ளார்.

இந்த தேசிய அனர்த்த முகாமை பேரவை, ஜனாதிபதி, பிரதமர் மற்றும் எதிர்க்கட்சித் தலைவர், 5 எதிர்க்கட்சி உறுப்பினர்கள் உட்பட 20 அமைச்சர்கள் பங்கேற்று உருவாக்கப்படலாம். இந்த பேரவை, கடலோர காவல்படையைச் சந்தித்து முடிவுகளை எடுத்திருக்க முடியும்.

ஆனால் யாரும் அத்தகைய முடிவை எடுக்கவில்லை. ஒரு தேசிய பேரழிவு ஏற்படும் என்று அறிவிக்கப்பட்டிருந்தால், தீயை அணைக்க இலங்கை வெளிநாட்டு உதவிகளைப் பெற்றிருக்க முடியும். தீ பரவியதால் இந்தியாவிலிருந்து தீயை அணைக்க இலங்கைக்கு உதவி கிடைத்தது.

எனினும் இந்தியாவுக்கான அறிவிப்பு தாமதமாகிவிட்டதால் தீ கட்டுப்பாட்டுக்குள் வரவில்லை. இந்தநிலையில் ஐரோப்பா மற்றும் கிழக்கு ஆசிய நாடுகளுக்கு இதுபோன்ற இரசாயனக் கப்பலின் தீ பற்றி மிகப் பெரிய அனுபவம் இருப்பதாக ரணில் சுட்டிக்காட்டியுள்ளார்.

சர்வதேச கடல்சார் அமைப்புக்கு ஏன் அறிவிக்கப்படவில்லை? தீயை அணைக்க சர்வதேச உதவி கோரப்படவில்லை? ஏன் தீ பரவி பெரிதாகும் நிலைக்கு அனுமதிக்கப்பட்டது ? என்ற கேள்விகள் தற்போது எழுந்துள்ளன.

இலங்கையின் எதிர்காலத்திற்கு ஏற்படும் சேதம் குறித்து ஏன் சிந்திக்கவில்லை? பொருளாதாரம் மற்றும் இந்த தீவிபத்தால் சுற்றுச்சூழலுக்கு ஏற்படும் பாதிப்பு தொடர்பில் அரசாங்கமும் கடல் சுற்றுச்சூழல் பாதுகாப்பு ஆணையமும் இந்த சிந்தித்திருக்க வேண்டும். நைட்ரிக் அமிலம் கலந்ததால் இலங்கைக் கடலில் கொழும்பைச் சுற்றியுள்ள பவளப்பாறைகள் அழிக்கப்படும் அபாயம் உள்ளது.

கொழும்பில் உள்ள பவளப்பாறை காரணமாகவே சுனாமி பேரழிவிலிருந்து இலங்கை தப்பியது என்று ரணில் தெரிவித்துள்ளார்.

எனவே, இந்த கப்பலில் ஏற்பட்ட தீ விபத்து குறித்து விசாரிக்க உடனடியாக நாடாளுமன்ற தேர்வுக் குழுவை அமைக்க வேண்டும் என்று ஐக்கிய தேசியக் கட்சியின் தலைவர் முன்மொழிந்துள்ளார்.

நாடாளுமன்றம் இந்த வாரம் கூடும்போது தேர்வுக்குழுவுக்கு உறுப்பினர்களை நியமிப்பதற்கும், ஒரு தேர்வுக் குழுவை அமைப்பதற்கும் வாய்ப்பு உள்ளது.

அதன்படி, கப்பல் தீ விபத்தால் ஏற்படும் சுற்றுச்சூழல் மற்றும் பொருளாதார சேதங்கள் குறித்த பூர்வாங்க அறிக்கையை முன்வைக்க இந்தக் குழு எதிர்வரும் ஜூலை முதல் வாரத்தில் கூட முடியும். கப்பல் எவ்வாறு தீப்பிடித்தது, ஏன் அதை அணைக்க முடியவில்லை என்பதை அறியும் உரிமை.

மேலும், கப்பல் தொடர்பாக அடுத்து என்ன நடவடிக்கை எடுக்கப்படும் என்பதை அறிய மக்களுக்கு உரிமை உண்டு. எனவே இது தொடர்பான விடயங்களை விரைவுபடுத்துமாறு அரசாங்கத்தைத் தாம் கேட்டுக்கொள்வதாக ரணில் விக்கிரமசிங்க தெரிவித்துள்ளார்.