தேசிய அரசாங்கம் அமைப்பது தொடர்பிலான அரசியல் நகர்வுகள்

இலங்கையில் அனைத்து கட்சி அரசாங்கத்தை அமைக்கும் முயற்சியில் புதிய பிரதமர் தினேஷ் குணவர்தன அரசியல் கட்சிகளுடன் பேச்சுவார்த்தைகளை ஒருங்கிணைக்கவுள்ளார்.

இதில் ஒரு கட்டமாக, நாடாளுமன்றத்தை பிரதிநிதித்துவப்படுத்தும் அரசியல் கட்சிகள் அரசாங்கத்தில் பங்கு வகிக்கக்கூடிய பொதுவான வேலைத்திட்டம் ஒன்று தொடர்பில் அவர் உடனடியாக பேச்சுவார்த்தைகளை ஆரம்பிக்கவுள்ளார்.

நாடாளுமன்றத்தின் தீர்மானம்

இதேவேளை எதிர்க்கட்சி தலைவர் சஜித் பிரேமதாச தலைமையிலான ஐக்கிய மக்கள் சக்திமற்றும் முன்னாள் ஜனாதிபதி மைத்திரிபால சிறிசேன தலைமையிலான ஸ்ரீலங்கா சுதந்திர கட்சி ஆகிய இரண்டு பிரதான கட்சிகளும் முன்வைக்கப்படும் முன்மொழிவுகளின் அடிப்படையில் தேசிய அரசாங்கத்தில் இணைவது குறித்து பரிசீலிக்கத் தயாராக இருப்பதாக தெரிவித்துள்ளன.

அமைச்சரவை அமைச்சர்களின் எண்ணிக்கையை 25 ஆகவும், ராஜாங்க மற்றும் துணை அமைச்சர்களின் எண்ணிக்கையை 40க்கும் குறைவாகவும் வைத்திருப்பதே தற்போதைய திட்டம் என்றும், ஆனால் கட்சிகளின் பதிலை பொறுத்து எண்ணிக்கையை அதிகரிக்கலாம் என்றும் அரசாங்க தரப்புக்கள் தெரிவித்துள்ளன.

அரசியலமைப்பு ரீதியாக தேசிய அரசாங்கம் ஒன்று அமைக்கப்பட்டால் அமைச்சரவை அமைச்சர்கள், இராஜாங்க அமைச்சர்கள் மற்றும் பிரதியமைச்சர்களின் எண்ணிக்கையை நாடாளுமன்றம் தீர்மானிக்க முடியும்.

நடைமுறையில் உள்ளபடி அமைச்சரவை 30 உறுப்பினர்களை தாண்டக்கூடாது என்றும், ராஜாங்க மற்றும் துணை அமைச்சர் பதவிகள் மொத்தம் 40 தாண்டக்கூடாது என்றும் அரசியலமைப்பு கூறுகிறது.

தேசிய அரசாங்கம் என்றால் என்ன? 

அரசியலமைப்பின்படி, ஒரு தேசிய அரசாங்கம் என்பது அங்கீகரிக்கப்பட்ட அரசியல் கட்சி அல்லது சுயேச்சைக் குழுவால் உருவாக்கப்பட்ட அரசாங்கமாக நாடாளுமன்றத்தில் அதிக எண்ணிக்கையிலான இடங்களை பெறும் என்று விபரிக்கப்பட்டுள்ளது.

இதேவேளை இடைக்கால அமைச்சரவை என்று வர்ணிக்கப்படும் தற்போதைய அமைச்சரவையில் இதுவரை 18 அமைச்சர்கள் மட்டுமே பதவியேற்றுள்ளனர்.

நாடாளுமன்றத்தில் அங்கம் வகிக்கும் ஏனைய கட்சிகளுடன் கலந்துரையாடியதன் பின்னர் அமைச்சரவை மாற்றம் செய்யப்படவுள்ளது.

இதற்கிடையில், சர்வக்கட்சி அரசாங்கத்தின் மாதிரி சமர்ப்பிக்கப்பட்ட பின்னர், கட்சிக்குள் விவாதித்து இறுதி முடிவை எடுக்க தயார் என்று ஐக்கிய மக்கள் சக்தியின் பொது செயலாளர் ரஞ்சித் மத்தும பண்டார தெரிவித்துள்ளார்.