டிஜிட்டல் காப்பீட்டு அட்டைகளை பயன்படுத்தும் சாரதிகளுக்கு அவசர அறிவிப்பு

டிஜிட்டல் காப்பீட்டு அட்டைகளை (Digital Insurance Cards) சரிபார்ப்பது தொடர்பாக வழங்கப்பட்ட அறிவுறுத்தல்கள் மற்றும் வழிகாட்டுதல்களை மீறி, வாகன செலுத்துனர்களை சிரமத்திற்கு உள்ளாக்குவது கடுமையான கடமை தவறு என வாகன போக்குவரத்து கட்டுப்பாடு மற்றும் சாலை பாதுகாப்பு பிரிவு பொறுப்பு துணை பொலிஸ் தலைவர் டபிள்யூ.பி.ஜே.சேனாதீர தெரிவித்துள்ளார்.

இன்றைய தினம் (03.09.2026) நடைபெற்ற ஊடக சந்திப்பில் வைத்து அவர் இந்த விடயத்தை கூறியுள்ளார்.

அவர் மேலும் தெரிவிக்கையில், பாதுக்க மற்றும் கம்பஹா பொலிஸ் நிலையங்களில் உள்ள சில அதிகாரிகள் டிஜிட்டல் காப்பீட்டு அட்டைகளை ஏற்க மறுத்து பொதுமக்களை பாதிப்புக்குள்ளாக்கியதாக அறிக்கைகள் கிடைத்துள்ளன.

அதன்படி, ஆர்.டி.எம். 93 சட்டத்தின் கீழ் 2026 மே 05 ஆம் திகதி வெளியிடப்பட்ட கூடுதல் அறிவிப்பின் மூலம், காப்பீட்டு ஒழுங்குமுறை ஆணையத்தால் அங்கீகரிக்கப்பட்ட, நாட்டின் முன்னணி 14 காப்பீட்டு நிறுவனங்களால் வழங்கப்படும் டிஜிட்டல் காப்பீட்டு அட்டைகளை அதிகாரபூர்வமாக ஏற்றுக்கொள்ளுமாறு பொலிஸ் தலைவர் நாட்டின் அனைத்து பொலிஸ் நிலையங்களுக்கும் அறிவுறுத்தப்பட்டுள்ளது.

டிஜிட்டல் காப்பீட்டு அட்டைகளுக்கு முழுமையான சட்ட அங்கீகாரம்

2006ஆம் ஆண்டின் 19ஆம் இலக்க மின்னணு பரிவர்த்தனை சட்டத்தின்படி டிஜிட்டல் காப்பீட்டு அட்டைகளுக்கு முழுமையான சட்ட அங்கீகாரம் உள்ளது. ஒரு ஓட்டுநரிடம் டிஜிட்டல் காப்பீட்டு அட்டை இல்லாத சந்தர்ப்பத்திலும் கூட, கீழ்கண்ட இலவச முறைகள் மூலம் காப்பீட்டு பாதுகாப்பு செயலில் உள்ளதா இல்லையா என்பதை பொலிஸ் அதிகாரிகள் உறுதிப்படுத்திக் கொள்ள முடியும்:

• *1338# என்ற எண்ணை அழைத்து காப்பீட்டு எண் அல்லது வாகன எண்ணை உள்ளிட்டு உடனடி தகவலைப் பெறுதல்
• 1338 எண்ணுக்கு குறுஞ்செய்தி (SMS) அனுப்புதல்
• 1338 உடனடி அழைப்பு மையத்தை (Call Center) தொடர்புகொள்ளுதல்

இதன் காரணமாக, நாடு முழுவதும் உள்ள 607 பொலிஸ் நிலையங்களின் நிலையத் தலைவர்கள் வழியாக கீழ்நிலை அதிகாரிகளுக்கு மீண்டும் விழிப்புணர்வு ஏற்படுத்த நடவடிக்கை எடுக்கப்பட்டுள்ளது.

ஏதேனும் ஒரு பொலிஸ் அதிகாரி டிஜிட்டல் காப்பீட்டு அட்டையை ஏற்க மறுத்தால், அதை அருகிலுள்ள பொலிஸ் நிலையத் தலைவரிடம் அல்லது வாகனப் போக்குவரத்து தலைமையகத்தின் சிறப்பு தொலைபேசி எண்ணான 0704755600 என்ற எண்ணுக்கு புகார் செய்யுமாறு பொதுமக்களிடம் கோரிக்கை விடுக்கப்பட்டுள்ளது. அத்தகைய அதிகாரிகளுக்கு எதிராக கடுமையான ஒழுங்கு நடவடிக்கை எடுக்கப்படும் எனவும் அவர் சுட்டிக்காட்டியுள்ளார். 

லண்டனுக்கு தப்பிச்செல்ல முயன்ற பிரபல அரசியல்வாதியின் மகன் அதிரடியாக கைது

பெருமளவு சந்தேகநபர்கள் சார்பில் பிணை மனுக்களை தாக்கல் செய்த மர்ம நபர்களால் சர்ச்சை