இலங்கை காட்டுக்கள் வெளிநாட்டு பெண்களின் செயலால் எழுந்துள்ள சர்ச்சை

இலங்கையின் லுணுகம்வெஹர, யால மற்றும் குமண தேசிய வனங்களுக்குள் அனுமதியின்றி வணிக ரீதியான நோக்கங்களுக்காக பிக்கினி உடையில் வெளிநாட்டு பெண்ணை வைத்து புகைப்பட படப்பிடிப்புகள் மேற்கொள்ளப்பட்டுள்ளது.

வெளிநாட்டு மொடல்களை பயன்படுத்தி படப்பிடிப்புகள் மேற்கொள்ளப்படுவதாக எழுந்துள்ள குற்றச்சாட்டுகள் குறித்து விசாரணை நடத்துமாறு தேசிய விலங்குக்காட்சி சாலை திணைக்களத்தின் முன்னாள் பணிப்பாளர் நாயகம் ஷர்மிளா ராஜபக்ச கோரிக்கை விடுத்துள்ளார்.

வணிக ரீதியாக படப்பிடிப்புகள்

தனது பேஸ்புக் பக்கத்தில் பதிவொன்றை பதிவிட்டு அவர் இது தொடர்பில் கேள்வி எழுப்பியுள்ளார்.

வெளிநாட்டு மொடல்களை பயன்படுத்தி வனங்களுக்குள் திறந்த சபாரி ஜீப் வண்டிகளைப் பயன்படுத்தி வணிக ரீதியாக படப்பிடிப்புகள் மேற்கொள்ளும் நடவடிக்கைகளை தனியார் நிறுவனம் ஒன்று மேற்கொண்டுள்ளனர்.

அந்த நிறுவனம் இந்த நடவடிக்கைகளை பிரபல்யப்படுத்தி வருவதாகத் தகவல்கள் கிடைத்துள்ளதாக அவர் சுட்டிக்காட்டியுள்ளார்.

இந்தச் செயற்பாடுகள் ஊடாக தேசிய வனங்களுக்குரிய சட்டதிட்டங்கள் மீறப்பட்டுள்ளதா வணிக படப்பிடிப்புகளுக்குத் தேவையான அனுமதி நிபந்தனைகள், குடிவரவு குடியகல்வு சட்டங்கள் மற்றும் சுற்றுலாத்துறைக்குரிய அனுமதி நிபந்தனைகள் மீறப்பட்டுள்ளதா என அவர் வினவியுள்ளார்.

சுற்றுலா வீசா

அத்துடன், சுற்றுலா வீசா அல்லது ETA மூலம் இலங்கைக்கு வெளிநாட்டுப் பெண்கள் வருகைத்தருகின்றனர். அவர்கள் வணிகரீதியான டொடலிங் பணியில் ஈடுபட அனுமதி உள்ளதா என்பது தொடர்பிலும் விசாரணை செய்யப்பட வேண்டும் என அவர் சுட்டிக்காட்டியுள்ளார்.

வனஜீவராசிகள் அதிகாரிகள், வனப் பொறுப்பதிகாரிகள், விலங்கு கண்காணிப்பாளர்கள் மற்றும் சபாரி ஜீப் வண்டிகளின் சாரதிகளின் அறிவுறுத்தலின்றி இவ்வாறான செயற்பாடுகள் இடம்பெற முடியுமா என்பது தொடர்பிலும் அவர் கேள்வி எழுப்பியுள்ளார்.

இதற்கமைய, இச்செயற்பாடுகளை ஒழுங்கமைத்த நபர்களின் மற்றும் அதற்கு வசதி செய்து கொடுத்த சபாரி ஜீப் வண்டிகளின் சாரதிகள் மற்றும் உரிமையாளர்களின் பங்குகளும் தொடர்புகளும் குறித்தும் விசாரணை நடத்தப்பட வேண்டும் என அவர் வலியுறுத்தியுள்ளார்.