அடுத்த மூன்று வாரங்களுக்கு நாட்டில் சவால் நிலை! தயாராகுமாறு பிரதமர் கோரிக்கை (Live)

நெருக்கடியான மூன்று வாரங்கள்

அடுத்த மூன்று வாரங்கள் நாட்டின் நெருக்கடியான காலமாக இருக்கும் என்று பிரதமர் ரணில் விக்ரமசிங்க குறிப்பிட்டுள்ளார்.

எனவே அதற்கு முகங்கொடுக்க நாட்டு மக்கள் தயாராகவேண்டும் என்று அவர் இன்று நாடாளுமன்றில் ஆற்றிய சிறப்பு உரையில் கோரிக்கை விடுத்துள்ளார்.

இதன்காரணமாக எரிபொருள் மற்றும் எரிவாயு கொள்வனவில் பொதுமக்கள், தனித்து செயற்படாது ஏனையவர்கள் தொடர்பிலும் தமது கவனத்தை செலுத்தவேண்டும் என்று அவர் கேட்டுக்கொண்டார்.

3300 மில்லியன் தேவை

அத்துடன் தேவையற்ற போக்குவரத்துகளை கட்டுபடுத்தல் உட்பட்ட விடயங்களில் பொதுமக்கள் கவனம் செலுத்தவேண்டும் என்று ரணில் விக்ரமசிங்க கோரிக்கை விடுத்துள்ளார்.

அடுத்த ஆறு மாதங்களுக்கு எரிபொருளை கொள்வனவு செய்வதற்கு 3300 மில்லியன் டொலர்கள் தேவை.

அதேநேரம் 6 மாதங்களுக்கு எரிவாயு கொள்வனவுக்காக 250 மில்லியன் டொலர்கள் தேவைப்படுவதாக ரணில் விக்ரமசிங்க குறிப்பிட்டுள்ளார்.

அரிசி தேவையை எடுத்துக்கொண்டால், அடுத்த 6 மாதங்களுக்கு 2.4 மில்லியன் நெல் தேவை. எனினும் நாட்டில் 1.6 மில்லியன் நெல் மாத்திரமே அறுவடை செய்யமுடியுமாக இருக்கும்.

அரிசி பற்றாக்குறை 

எனவே அரிசி பற்றாக்குறையை தடுப்பதற்கு அரிசியை இறக்குமதி செய்வதற்கு மாதத்துக்கு 150 மில்லியன் டொலர்கள் தேவை என்றும் ரணில் விக்ரமசிங்க தெரிவித்துள்ளார்.

இந்தநிலையில் அடுத்த ஆறு மாதங்களுக்கு நாட்டை இயல்பு நிலைக்கு கொண்டு செல்ல ஆறு பில்லியன் டொலர்கள் அவசியம்.

இந்த தொகையை நாட்டுக்குள் தேடமுடியாத நிலையில், வெளியில் இருந்தே இதனை தேடவேண்டியுள்ளது என்றும் பிரதமர் ரணில் விக்ரமசிங்க குறிப்பிட்டுள்ளார்.

இதேவேளை விரும்பியோ விரும்பாமலோ இன்னும் ஒரு ட்ரில்லியன் ரூபாவை அச்சிடவேண்டியுள்ளதாக ரணில் விக்ரமசிங்க தெரிவித்துள்ளார்.