மேடைகளில் சத்தமிடுபவர்கள் தோல்விப் பயத்திலேயே பேசுகின்றனர்! நாமல் ராஜபக்ச எம்.பி. சாடல்

அரசாங்கத்தை விட்டு ஒருபோதும் வெளியேறப் போவதில்லை என்றும் மீண்டும் ஆட்சி அதிகாரத்தை பிறரிடம் ஒப்படைக்க மாட்டோம் என்றும் மேடைகளில் சத்தமிடுபவர்கள், உண்மையில் தோல்வி பயத்தினால் மட்டுமே அவ்வாறு பேசுகிறார்கள் என்று நாடாளுமன்ற உறுப்பினர் நாமல் ராஜபக்ச கண்டி மாரஸ்ஸன விகாரையில் நடைபெற்ற நிகழ்வொன்றின் பின்னர் ஊடகங்களுக்கு தெரிவித்துள்ளார்.

மக்கள் வழங்கிய தீர்ப்புகளுக்கு எப்போதும் மதிப்பளித்து, தலைவணங்கிப் பழகிய அரசியல் பாரம்பரியமே தங்களுடையது என்று சுட்டிக்காட்டிய அவர், மக்களுடன் இணைந்தே தாங்கள் அரசியல் செய்வதாகவும் கூறினார்.

தொடரும் கபில சந்திரசேனவின் மரண விசாரணை..! அரவிந்த டி சில்வாவின் மனைவி மூலம் இடம்பெற்ற தொலைபேசி உரையாடல்

அடிமட்ட அரசியல் செயற்பாடுகள்

மக்கள் தங்களுக்கு வாக்களித்து அதிகாரத்தைத் தரும்போது அவர்களின் தேவைகளை நியாயமான முறையில் நிறைவேற்றுவதாகவும், அதேபோன்று மக்கள் தங்களை நிராகரிக்கும் பட்சத்தில், அதனை முதிர்ச்சியோடு ஏற்றுக்கொண்டு, எமது அரசியல் பயணத்தை மீண்டும் ஆரம்பத்தில் இருந்து சாதாரணமாகத் தொடங்குவதுதான் தங்களின் வழமையாகும் என்றும் அவர் விளக்கமளித்தார்.

ஸ்ரீலங்கா பொதுஜன பெரமுன தற்போதும் அடிமட்ட அரசியல் செயற்பாடுகளில் தீவிரமாக ஈடுபட்டு வருவதாகக் குறிப்பிட்ட அவர்,

 குருணாகல் பகுதியில் கட்சியின் முக்கிய கூட்டங்கள் மற்றும் கிராம மட்டச் சந்திப்புகள் வெற்றிகரமாக முன்னெடுக்கப்பட்டு வருவதாகக் கூறினார்.

மக்களின் உண்மையான தேவைகள் மற்றும் விருப்பங்கள் என்ன என்பதை தாங்கள் நன்கறிந்து வைத்துள்ளதாகக் குறிப்பிட்ட நாமல் ராஜபக்ச, தற்போதைய அரசாங்கத்தினால் மக்களுக்கு இழைக்கப்படும் அநீதிகள் மற்றும் அவர்களின் தவறான நிர்வாகக் கொள்கைகளை எவ்வித பயமுமின்றி தொடர்ந்து வெளிப்படுத்துவோம் என்றும் உறுதியளித்தார்.

இதேவேளை, தற்போதைய அரசாங்கத்தின் ஒன்றரை வருட கால ஆட்சியில் நாட்டின் நிலைமை குறித்தும், அதற்கு எதிராக ஒன்றிணைய முடியாதவாறு எதிர்க்கட்சிகள் பலவீனமடைந்துள்ளமை குறித்தும் ஊடகவியலாளர்கள் எழுப்பிய கேள்விக்கு அவர் விரிவான பதிலளித்தார்.

இந்த அரசைக் கவிழ்க்க எந்தச் சந்தர்ப்பத்திலும் ஆதரவளிக்க மாட்டேன்! பொன்சேகா திட்டவட்டம்

அரசியல் கொள்கை

எதிர்க்கட்சிகள் இன்று கொள்கை ரீதியாக பிளவுபட்டு, துண்டு துண்டாகக் குழுக்களாகப் பிரிந்து கூட்டங்களை நடத்தி வருவதாக அவர் விமர்சித்தார்.

நாட்டின் எதிர்காலத்தை எந்த அரசியல் சக்தி முன்னோக்கி நகர்த்த வேண்டும் என்பதை கொழும்பில் உள்ள குளிரூட்டப்பட்ட அறைகளில் அமர்ந்திருக்கும் தலைவர்கள் தீர்மானிக்க முடியாது என்றும், அதனை நாட்டு மக்களே களத்தில் தீர்மானிப்பார்கள் என்றும் அவர் சுட்டிக்காட்டினார்.

தங்களைப் பொறுத்தவரை, இந்த நாட்டில் பல்லின அரசியல் கலாசாரம் மற்றும் பல்லுயிர்த்தன்மை பாதுகாக்கப்பட வேண்டும் என்பதில் உறுதியாக இருப்பதாகக் குறிப்பிட்ட நாமல் ராஜபக்ச, அரசாங்கத்திடம் இந்த ஜனநாயக அரசியல் முறையைப் பாதுகாக்குமாறு கோரும் அதேவேளை, எதிர்க்கட்சிகள் அனைத்தும் ஒன்றாக இணைந்து ஒரே அணியாகச் செயற்பட வேண்டும் என்று எதிர்பார்ப்பது நடைமுறைக்கு சாத்தியமற்றது என்றும், அது நியாயமானது அல்ல என்றும் தெரிவித்தார்.

எனவே, அனைத்து அரசியல் கட்சிகளும் தத்தமது அரசியல் கொள்கைகளின்படி சுதந்திரமாகப் பணிகளை முன்னெடுக்க வேண்டும் என்றும் எமது கட்சியின் பலத்தை கிராம மட்டத்தில் இருந்து நாம் தொடர்ந்தும் பலமாக கட்டியெழுப்புவோம் என்றும் அவர் குறிப்பிட்டார்.

அத்துடன், மக்களின் அடுத்தகட்டத் தேவைக்குரிய தலைமைத்துவம் எங்கு, எவ்வாறு உருவாக வேண்டும் என்பதை வரவிருக்கும் காலங்களில் மக்களே தங்களின் ஜனநாயகம் மற்றும் தேவைகளின் அடிப்படையில் தீர்மானிப்பார்கள் என்றும் நாமல் ராஜபக்ச தனது உரையில் திட்டவட்டமாக வலியுறுத்திக் கூறினார்.

யாழில் பிறந்து 24 நாட்களேயான ஆண் குழந்தை உயிரிழப்பு!