இரண்டு ஆண்டுகளில் அரசாங்கத்தின் சாதனை என்ன..! நாடாளுமன்றில் கேள்வியெழுப்பிய நாமல்

SLPP Anura Kumara Dissanayaka Namal Rajapaksa

By Shadhu Shanker Sep 22, 2026 10:32 AM GMT

Shadhu Shanker

in அரசியல்

Report

அரசாங்கம் கடந்த இரண்டு ஆண்டுகளில் செய்த சாதனைகள் எனக் காட்டுவதற்கு அதிகம் எதுவும் இல்லை எனக் கூறி, ஜனாதிபதி அநுர குமார திஸாநாயக்க மீது ஸ்ரீலங்கா பொதுஜன பெரமுன நாடாளுமன்ற உறுப்பினர் நாமல் ராஜபக்ச குற்றச்சாட்டொன்றை முன்வைத்துள்ளார்.

நாடாளுமன்றத்தில் இன்றையதினம்(22) உரையாற்றிய நாமல் ராஜபக்ச, ஜனாதிபதி தற்போது நாடு முழுவதும் சென்று முன்னர் வழங்கிய வாக்குறுதிகளில் இருந்து விலகி புதிய வாக்குறுதிகளை வழங்கி வருவதாகத் தெரிவித்துள்ளார்.

நாமல் ராஜபக்ச குற்றச்சாட்டு

போலியான வாக்குறுதிகளை வழங்குவதை நிறுத்திவிட்டு, மக்களுக்கு பயனளிக்கும் வகையில் நடைமுறை முடிவுகளை வழங்குவதில் அரசாங்கம் கவனம் செலுத்த வேண்டும் எனவும் அவர் கூறியுள்ளார்.

அரசாங்கம் பதவியேற்றபோது பணவீக்கம் எதிர்மறையாக இருந்ததாகவும், தற்போது அது 8.1 சதவீதமாக அதிகரித்துள்ளதாகவும் நாமல் ராஜபக்ச தெரிவித்துள்ளார். அதேவேளை, பொருளாதார வளர்ச்சி 5.3 சதவீதத்தில் இருந்து 4.1 சதவீதமாக குறைந்துள்ளதாகவும் அவர் குறிப்பிட்டுள்ளார்.

எனினும், 2026 ஒகஸ்ட் மாதத்திற்கான தேசிய நுகர்வோர் விலைச் சுட்டெண்ணின் அடிப்படையிலான வருடாந்த பணவீக்கம் 8.1 சதவீதமாக இருந்தது என்பதை இலங்கை தொகைமதிப்பு மற்றும் புள்ளிவிபரத் திணைக்களத்தின் தரவுகள் உறுதிப்படுத்துகின்றன.

“ஜனாதிபதி 1,000 4G கோபுரங்களை அமைப்பதாக வாக்குறுதி அளிக்கிறார். ஆனால், ஏற்கனவே 5G வசதி உள்ளது என்பதை அவர் அறிந்திருக்கவில்லை போல் தெரிகிறது.

மேலும் 450 குளங்களை அமைப்பதாகவும் வாக்குறுதி அளித்துள்ளார். வறட்சியால் பாதிக்கப்பட்ட பகுதிகளில் குறைந்தபட்சம் இரண்டு குளங்களையாவது சுத்தம் செய்யுமாறு அரசாங்கத்திடம் கோருகிறோம்” என நாமல் ராஜபக்ச தெரிவித்துள்ளார்.