யாழில் போதையில் வாகனம் செலுத்திய சாரதிக்கு பிணை

யாழ்ப்பாணத்தில் கஞ்சா போதையில் வாகனம் செலுத்திய குற்றச்சாட்டில் கைதான சாரதி, ஆயுள்வேத மருத்துவ சிகிச்சை பெற்று வருவதனால் தான் கஞ்சா போதை பாவித்தமைக்கான அறிகுறிகள் காட்டப்பட்டதாக தெரிவிக்கப்பட்டதையடுத்து அவருக்கு பிணை வழங்கப்பட்டுள்ளது. 

யாழ்ப்பாணத்தில் இருந்து ஊர்காவற்துறைக்கு பயணிகளை ஏற்றி சென்ற பேருந்தின் சாரதி போதைப்பொருள் பாவித்த குற்றச்சாட்டில் கடந்த வெள்ளிக்கிழமை கைது செய்யப்பட்டார்.

அதனை அடுத்து மறுநாள், ஊர்காவற்துறை நீதிமன்றில் அவரை பொலிஸார் முற்படுத்திய நிலையில் இன்று வரையில் விளக்கமறியலில் வைக்குமாறு மன்று உத்தரவிட்டிருந்தது.

ஆயுள்வேத சிகிச்சை 

இந்நிலையில், குறித்த வழக்கு இன்றைய தினம் விசாரணைக்கு எடுத்துக்கொள்ளப்பட்ட போது, விளக்கமறியலில் வைக்கப்பட்டிருந்த சாரதி மன்றில் முற்படுத்தப்பட்டார்.

இதன்போது நடைபெற்ற வழக்கு விசாரணையின் போது சாரதியின் தரப்பின் முன்னிலையான சட்டத்தரணி, தனது கட்சிக்காரர் போதைப்பொருள் பாவிக்கவில்லை.

அவர் ஆயுள்வேத மருத்துவ சிகிச்சை பெற்று வருகிறார். அதனால், பரிசோதனையில் போதைப்பொருள் பாவித்தமைக்கான அறிகுறிகள் காணப்பட்டு இருக்கும் என தெரிவித்துள்ளார். 

அத்துடன், மருத்துவ அறிக்கை, ஆயுள்வேத வைத்தியரின் உறுதிப்படுத்தல் அறிக்கை மற்றும் பாவிக்கும் மருந்துகள் என்பவற்றை மன்றுக்கு காண்பித்து பிணை விண்ணப்பம் செய்துள்ளார்.

அதனை அடுத்து சாரதியை இரண்டு சரீர பிணையில் செல்ல அனுமதித்த மன்று வழக்கினை எதிர்வரும் ஜனவரி மாதத்திற்கு ஒத்திவைத்துள்ளது.

வாடகை வீட்டில் தங்கியிருந்த தம்பதியினர் மர்மமான முறையில் திடீரென உயிரிழப்பு

சர்வதேச கிரிக்கெட்டுக்கு விடைகொடுத்தார் கிளென் மேக்ஸ்வெல்