இலங்கையுடனான உறவை மறுபரிசீலனை செய்யும் இந்தியா

இலங்கையில், சீனா பாரியளவில் ஊடுருவி வருவதால், இலங்கையுடனான இருதரப்பு உறவுகளை மறுபரிசீலனை செய்வது தொடர்பில் இந்தியா கவனம் செலுத்தி வருவதாக இந்திய ஊடகங்கள் செய்தி வெளியிட்டுள்ளன.

பீஜிங்கால் 1.4 பில்லியன் டொலர் நிதியளிக்கப்பட்ட கொழும்பு போர்ட் சிட்டி திட்டத்துடன் முன்நோக்கி செல்ல இலங்கை அரசாங்கம் கடந்த மாதம் தீர்மானித்தது.

இலங்கையில் ராஜபக்ஷவினரின் ஆட்சி திரும்பியதைத் தொடர்ந்து இலங்கையுடனான இருதரப்பு உறவுகளை மீளமைப்பதை இந்தியா விரும்பியது. எனினும் சீனாவுடன் “முழுமையாக இணங்குவது” குறித்த இலங்கையின் உறுதியான முடிவை அடுத்து இந்தியா தமது நிலைப்பாடு தொடர்பாக ஆராய்வதாக சில தரப்புக்களை மேற்கோள் காட்டி தெ பிரிண்ட் செய்தி வெளியிட்டுள்ளது.

கடந்த மாதம், இலங்கை நாடாளுமன்றம் சர்ச்சைக்குரிய யோசனையை நிறைவேற்றியது.கொழும்பு துறைமுக நகர பொருளாதார ஆணையம் என்ற இந்த யோசனையின் ஊடாக கொழும்பு துறைமுக நகர சிறப்பு பொருளாதார மண்டலம் (SEZ) மற்றும் கொழும்பு துறைமுக நகர பொருளாதார ஆணையம் (CPCEC) ஆகியவை நிறுவப்படும்.

எதிர்க்கட்சிகளின் கடுமையான எதிர்ப்பு மற்றும் கொழும்பு துறைமுக நகரம் இலங்கைக்குள் ஒரு ‘சீன மாகாணமாக’ மாறக்கூடும் என்ற கவலை இருந்தபோதிலும் இந்த யோசனை நிறைவேற்றப்பட்டது.

முன்மொழியப்பட்ட புதிய ஆணையகம் பரந்த அளவிலான அதிகாரங்களைக் கொண்டிருக்கும் என்று எதிர்பார்க்கப்படுகிறது, மேலும் துறைமுக நகரம் இலங்கையின் மாநகர சபை மற்றும் விதிமுறைகளுக்கு உட்பட்டதாக இருக்காது, இதனால் அது ஜனநாயக ரீதியாக செயல்படாது என்ற கவலையும் எழுப்பப்பட்டுள்ளது.

இலங்கை இப்போது “முற்றிலும் சீனாவின் கட்டுப்பாட்டின் கீழ் வந்துள்ளது ”இது இந்தியாவுக்கு பாதுகாப்பு அச்சுறுத்தலை ஏற்படுத்தும் அதே வேளையில் அங்குள்ள அனைத்து எதிர்கால அரசாங்கங்களுக்கும் இது ஒரு சவாலாக இருக்கும் என்றும் தெரிவித்துள்ளது.

கடந்த பெப்ரவரி மாதம் இந்தியாவுக்கும், இலங்கைக்கும் இடையிலான உறவுகள் வீழ்ச்சியடையத் தொடங்கின. கொழும்பு துறைமுகத்தில் உள்ள மூலோபாய முக்கியத்துவம் வாய்ந்த கிழக்கு கொள்கலன் முனையத்தை இந்தியாவுக்கு வழங்குவது என்ற நிலைப்பாட்டை கொழும்பு திரும்பப் பெற்றுக்கொண்டதன் பின்னரே இது நிகழ்ந்தது.

இது ஜப்பானுடனான முத்தரப்பு ஒப்பந்தமாகும். அதற்கு பதிலாக இந்தியாவிற்கு மேற்கு கொள்கலன் முனையத்தை (WCT) முன்னைய அரசாங்கத்திலிருந்து அரசாங்கத்திற்கு உடன்படிக்கை போலல்லாமல் ஒரு தனியார் ஒப்பந்தமாக இலங்கை வழங்கியது.

இந்தியப் பிரதமர் நரேந்திர மோடி மற்றும் ராஜபக்ஷ சகோதரர்களான ஜனாதிபதி கோட்டபய ராஜபக்ஷ மற்றும் பிரதமர் மஹிந்த ராஜபக்ஷ ஆகியோருக்கு இடையிலான ஆரம்ப நெருக்கம் மற்றும் இலங்கை தொடர்பில் 'இந்தியா-முதல்' கொள்கையை கடைபிடிப்பது என்ற நிலைப்பாடு இப்போது வேகமாக மறைந்து வருகிறது.

எவ்வாறாயினும், இந்தியா இப்போது கொழும்பின் மேற்கு கொள்கலன் முனையத்தை செயற்படுத்தி வருகிறது, அதானி குழுமத்தால் அதன் "மூலோபாய இருப்பை" உணர வைக்கும் வகையில் அது உருவாக்கப்பட்டுள்ளது.

அதானி குழு, நீண்ட காலமாக அங்கு முதலீடு செய்யும் என்ற வகையில், அது தனியாராக இருந்தாலும், பொதுவாக இருந்தாலும் சரி, சீனா பெரிய அளவில் நிலைகொண்டுள்ள கொழும்பு துறைமுகப்பகுதியில் இந்தியா இருக்கும் என்பதில் புது தில்லி திருப்தி அடைகிறது, என்று இந்திய தரப்பு ஒன்று தெரிவித்துள்ளது.

ராஜபக்ச அரசாங்கம் தனது அரசியலமைப்பில் 13 ஆவது திருத்தத்தை அமுல்படுத்துவதன் மூலம் பல தசாப்தங்கள் நீண்டுபோயுள்ள இலங்கை தமிழர் பிரச்சினையை முன்னெடுப்பதில் இந்தியா இப்போது அதிக கவனம் செலுத்த திட்டமிட்டுள்ளது.

இது தமிழ் சிறுபான்மையினருக்கு நல்லிணக்கத்தை வழங்குவதை நோக்கமாகக் கொண்டுள்ளது. ராஜபக்ச சகோதரர்கள் 2019 ல் ஆட்சிக்கு வந்ததிலிருந்து இந்த பிரச்சினையை பல முறை இந்தியா எழுப்பியுள்ளது.

இலங்கை அரசியலமைப்பின் 13 வது திருத்தம் 1987 ஆம் ஆண்டில் இந்தியா-இலங்கை ஒப்பந்தத்தின் கீழ் இந்திய தலையீட்டின் நேரடி விளைவாக இலங்கையின் உள்ளூர் சட்டத்தின் ஒரு பகுதியாக மாறியது.

இலங்கையில் ஒன்பது மாகாணங்களுக்கு ஒரு மாகாண சபை அமைப்பை நிறுவுவதற்கும் அதிகாரப் பகிர்வு செய்வதற்கும் இது முன்மொழிகிறது. இருப்பினும், இலங்கையில் அடுத்தடுத்து வந்த அரசாங்கங்கள் அதை செயல்படுத்தவில்லை என்பதை சுட்டிக்காட்டியுள்ளது.