கோட்டாபய - ரணில் ஆட்சி மக்களின் துன்பத்தை மோசமாக்குகின்றது! லக்‌ஷ்மன் கிரியெல்ல

கோட்டாபய - ரணில் ஆட்சி இலங்கையில் உள்ள மில்லியன் கணக்கான குடும்பங்களின் துயரத்தை மேலும் மோசமாக்குவதாக லக்ஷ்மன் கிரியெல்ல குற்றம்சாட்டியுள்ளார்.

எதிர்க்கட்சியின் பிரதம கொறடாவும் , ஐக்கிய மக்கள் சக்தியின் சிரேஷ்ட உப தலைவருமான லக்ஷ்மன் கிரியெல்ல தென்னிலங்கை ஊடகம் ஒன்றுக்கு கருத்து வெளியிடும் ​போது மேற்கண்ட குற்றச்சாட்டை முன்வைத்துள்ளார். தொடர்ந்தும் கருத்து வெளியிட்டுள்ள அவர்,

இந்த அரசாங்கம் மக்களின் துன்பங்களை மேலும் அதிகரிப்பதை உடனடியாக நிறுத்திவிட்டு, அனைத்துக் கட்சிகளின் இடைக்கால அரசாங்கத்தின் கீழ் புதிய ஜனாதிபதி, பிரதமர் மற்றும் அமைச்சரவையைத் தெரிவு செய்வதற்கு நாடாளுமன்றத்திற்கு வழிவகை செய்ய வேண்டும்.

சர்வதேச நாணய நிதியத்தை ஏமாற்றிய கோட்டாபய ராஜபக்ச ஆட்சி

கோட்டாபய ராஜபக்ச ஆட்சியானது சர்வதேச நாணய நிதியமான IMF-ஐ ஏமாற்றிவிட்டது. எனவே உலக வங்கி,ஆசிய அபிவிருத்தி வங்கி போன்ற வேறு எந்த சர்வதேச நிதி நிறுவனமும் சீனா, இந்தியா, அமெரிக்கா, ஐரோப்பிய ஒன்றிய நாடுகள், ஜப்பான், இங்கிலாந்து அல்லது கொரியா போன்ற நன்கொடை நாடுகளும் இலங்கைக்கு தற்போதைய பொருளாதார, அரசியல் மற்றும் சமூக நெருக்கடிகளில் இருந்து விடுபட உதவாது.

“இந்த ஆண்டின் தொடக்கத்தில் இலங்கைக்கு உதவுமாறு எமது நட்பு நாடுகள் சர்வதேச நாணய நிதியத்திடம் கோரியபோது, ​​அதன் உதவிக்கு தகுதிபெற இலங்கை பொருளாதார மற்றும் அரசியல் சீர்திருத்தங்களை அறிமுகப்படுத்த வேண்டும் என்று IMF கூறியது.

அரசியல், பொருளாதார, சமூகக் கொந்தளிப்பால் நாசமடைந்த நாட்டிற்குப் பணத்தைக் கொடுத்து அதன் நிதியை வீணடிக்க சர்வதேச நாணய நிதியம் தயாராக இல்லை. ஆனால் SLPP தலைமையிலான ஆட்சியோ அல்லது ரணில் - கோட்டாபய ஆட்சியோ அரசியல், பொருளாதார மற்றும் சமூக ஸ்திரத்தன்மையை மீட்டெடுக்க அரசியல் மற்றும் பொருளாதார சீர்திருத்தங்களை அறிமுகப்படுத்தத் தவறிவிட்டது.

மே 11 அன்று நாட்டு மக்களுக்கு ஆற்றிய உரையில், ஜனாதிபதி ராஜபக்ஷ, புதிய பிரதமர் மற்றும் அரசாங்கத்தை விரைவில் நியமித்த பின்னர், அரசியலமைப்பு திருத்தங்கள் அறிமுகப்படுத்தப்படும் என்றும், அரசியலமைப்பின் 19 வது திருத்தத்தின் உள்ளடக்கங்களை நிறைவேற்றும் என்றும், இது நாடாளுமன்றத்திற்கு அதிக அதிகாரங்களை வழங்கும் என்றும் வாக்குறுதியளித்தார்.

ராஜபக்சக்கள் எவரும் இல்லாத இளம் அமைச்சரவை

ராஜபக்சக்கள் எவரும் இல்லாத இளம் அமைச்சரவையை நியமிப்பேன். புதிய அரசாங்கத்தின் பிரதமருக்கு புதிய வேலைத்திட்டத்தை உருவாக்கி இந்த நாட்டை முன்னோக்கி கொண்டு செல்வதற்கான வாய்ப்பு வழங்கப்படும்” என்றும் கோட்டாபய ராஜபக்ஷ உறுதியளித்தார். “அவர் இந்த உறுதிமொழியை மதித்தாரா? இல்லை. அரசாங்கத்தால் அமைச்சரவைக்கு சமர்ப்பிக்கப்பட்ட உத்தேச 21வது A இன் வரைவு 19A இன் மைனஸ் ஆகும்.

வாக்குறுதியளித்தபடி 19A பிளஸ் அல்ல. அது மாத்திரமன்றி அமெரிக்கத் தூதுவர் ஜூலி சங் கடந்த ஏப்ரல் 27ஆம் திகதி பாராளுமன்றத்தில் சபாநாயகரைச் சந்தித்தபோது, ​​புதிய பிரதமர் உட்பட அரசாங்கம் அரசியல் ஸ்திரத்தன்மையைக் கொண்டு வந்து தற்போதைய பொருளாதார நெருக்கடியைச் சமாளிக்க முடியும் என நம்புவதாகவும் தூதுவர் தெரிவித்தார்.

மக்கள் விரும்பும் அரசியல் சீர்திருத்தங்களை மேற்கொள்ளவும், நாட்டில் ஜனநாயகத்தைப் பாதுகாக்கவும் வேண்டியதன் அவசியத்தை அவர் வலியுறுத்தினார், ”இந்த வாக்குறுதிகளை அரசாங்கம் நிறைவேற்றியுள்ளதா? இல்லை. அதனால் தான், உள்ளூர் மற்றும் உலக சமூகத்தால் நிராகரிக்கப்பட்ட அரசாங்கத்தை அனைத்துக் கட்சி ஆட்சி அமைக்க வழிவகை செய்யுமாறும், 21வது ஏ சட்டத்தை அமல்படுத்தி, நாடாளுமன்றத் தேர்தலை தவறாமல் நடத்த கால அவகாசம் வழங்குமாறும் ஐக்கிய மக்கள் சக்தி வலியுறுத்துகிறது.

மே 9 வன்முறைச் சம்பவங்களில் இருந்து அவர்கள் இன்னும் பாடம் கற்கவில்லை என்று தெரிகிறது, என்றும் லக்‌ஷ்மன் கிரியெல்ல வலியுறுத்தியுள்ளார்