இராமேஸ்வரம் அருகே கரை ஒதுங்கிய இராட்சத திமிங்கலம்

Mannar Tamil nadu Rameswaram

By Ashik Dec 12, 2024 08:20 AM GMT

Ashik

in இயற்கை

Report

தமிழகத்தின் இராமேஸ்வரம் அருகே பாம்பன் கடலில் 2 டொன் எடையுள்ள இராட்சத திமிங்கலம் கரை ஒதுங்கியுள்ளது.

அதன் உடலை நேற்று (11.12.2024) காலை கைப்பற்றி வனத்துறையினர் உடற்கூறு ஆய்வு செய்து பாம்பன் கடற்கரை மணலில் புதைப்பதற்கான ஏற்பாடுகள் நடைபெற்று வருகிறது.

ராட்சத திமிங்கலம் ஒன்று இறந்த நிலையில் கரை ஒதுங்கி இருப்பதாக கடற்றொழிலாளர்கள் கொடுத்த தகவலின் அடிப்படையில் வனத்துறையினர் கடற்கரைக்கு சென்று பார்த்தபோது, அங்கு 18 அடி நீளமும் 2 டொன் எடையும் கொண்ட அரிய வகை இராட்சத திமிங்கலம் ஒன்று கரை ஒதுங்கி இருந்துள்ளது.

உடற்கூறு ஆய்வு

இறந்த திமிங்கலம் நீலத் திமிங்கல வகையை சேர்ந்தது. இந்த வகை திமிங்கலங்கள் 118 அடி நீளம் வரை வளரக்கூடியது. ஆனால் தற்போது இறந்த நிலையில் கரை ஒதுங்கிய திமிங்கலம் நீலத் திமிங்கலத்தின் குட்டியாக இருக்கலாம் எனவும் தெரிவிக்கப்பட்டுள்ளது.

பெரிய கப்பல் அல்லது கடலுக்கு அடியில் உள்ள பாறை போன்றவற்றாலும் மோதி அடிபட்டு இறந்து உடல் அலைகளால் அடித்து வரப்பட்டு பாம்பன் தெற்கு கடற்கரையில் ஒதுங்கியதா என்பது குறித்து உடற்கூறு ஆய்வின் முடிவில் தெரியவரும் என வனத்துறை அதிகாரிகள் தெரிவித்துள்ளனர்.

இதனையடுத்து, வனத்துறையினர் கரை ஒதுங்கிய திமிங்கல உடலை ஜே.சி.பி உதவியுடன் மீட்டு கால்நடை மருத்துவரை கொண்டு இறந்த திமிங்கலத்தை உடற்கூறு ஆய்வு செய்து கடற்கரை மணலில் புதைக்கும் பணி தொடர்ந்து நடைபெற்று வருகிறது.

இராமேஸ்வரம் அருகே கரை ஒதுங்கிய இராட்சத திமிங்கலம் | Giant Whale Washed Ashore Near Rameswaram

மன்னார் வளைகுடா கடல் பகுதியில் அரிய வகை கடல்வாழ் உயிரினங்களான கடல் பசு, திமிங்கலம், சுறா, டொல்பின், கடல் குதிரை, கடல் பல்லி, உள்ளிட்ட அரிய வகை கடல்வாழ் உயிரினங்கள் வசிக்கின்றமை குறிப்பிடத்தக்கது.