அயலுறவுக்கு முதலிடம்! ஆபத்துக்கு உதவும் இந்தியா(Photo)

இலங்கையின் தற்போதைய பொருளாதார நெருக்கடிக்கு இந்திய அரசாங்கம் தொடர்ந்தும் உதவிகளை வழங்கிவருகின்றது.

இதற்கமைய இலங்கை மக்களுக்கான உதவி திட்டத்தின் இரண்டாம் கட்டமாக உலர் உணவு பொதிகள்  இந்திய அரசாங்கத்தால் அனுப்பி வைக்கப்பட்டுள்ளன.

விசேட தூதுக்குழுவினர்

இந்திய வெளிவிவகார அமைச்சின் செயலாளர் வினய் குவாத்ரா தலைமையிலான விசேட தூதுக்குழுவினர் நேற்று(23) இலங்கைக்கு விஜயம் மேற்கொண்டனர்.

இந்த தூதுக்குழுவினர் ஜனாதிபதி மற்றும் பிரதமருடன் நாட்டின் பொருளாதார நெருக்கடி குறித்து கலந்துரையாடியுள்ளனர்.

மேலும் பொருளாதார விவகாரங்களுக்கான திணைக்களத்தின் செயலாளர் அஜய் சேத், தலைமைப் பொருளாதார ஆலோசகர் கலாநிதி வி.அனந்த நாகேஸ்வரன் மற்றும் இந்திய வெளியுறவு அமைச்சின் இந்து சமுத்திர பிராந்தியத்துக்கான இணைச் செயலாளர் கார்த்திக் பாண்டே உள்ளிட்ட பலர் இந்த கலந்துரையாடலில் ஈடுபட்டுள்ளனர்.

அயலுறவுக்கு முதலிடம் 

இதன்போது இந்திய பிரதமர் நரேந்திர மோடியின் கொள்கைக்கமைய 'அயலுறவுக்கு முதலிடம் கொள்கை' வழிகாட்டலின் அடிப்படையிலேயே இலங்கை மக்களுக்கான 3.5 பில்லியன் அமெரிக்க டொலருக்கும் அதிக பெறுமதியான பொருளாதார, நிதி மற்றும் மனிதாபிமான ரீதியிலான உதவி அமைந்துள்ளதாக சுட்டிக்காட்டப்பட்டுள்ளது.

இதேவேளை பிரதமருடன் இலங்கையின் பொருளாதார நிலவரம் குறித்தும் பொருளாதார மீட்சிக்காக இலங்கை அரசாங்கம் எடுத்துள்ள முயற்சிகள் தொடர்பாகவும் ஆழமான கலந்துரையாடல்கள் இரு தரப்பினரிடையிலும் இடம்பெற்றுள்ளன.

கலந்துரையாடல்

இதன்போது உட்கட்டமைப்பு, தொடர்பாடல்கள், புதுப்பிக்கத்தக்க சக்தி, மற்றும் இரு நாடுகளுக்கும் இடையிலான பொருளாதார உறவுகளை மேலும் வலுவாக்கல் உள்ளிட்ட விடயங்கள், முதலீட்டு பங்குடைமையை மேம்படுத்தலின் முக்கியத்துவம் குறித்தும் இந்த சந்திப்பில் இருதரப்பினரும் சுட்டிக்காட்டியுள்ளனர்.

மேலும் பயங்கரவாத ஒழிப்பு, கடல் பாதுகாப்பு, அனர்த்த முகாமைத்துவம், மனிதாபிமான உதவி, அபிவிருத்தி ஒத்துழைப்பு, வர்த்தக ரீதியான உறவுகள் மற்றும் இரு நாட்டு மக்களிடையிலான தொடர்புகள் உள்ளிட்ட விடயங்களில் கடந்த சில ஆண்டுகளாக இந்திய மக்களாலும் அரசாங்கத்தாலும் வழங்கப்பட்டுவரும் உறுதியான ஆதரவை இலங்கை தரப்பினர் சுட்டிகாட்டியுள்ளமை குறிப்பிடத்தக்கது.     

ஜி.எல்.பீரிஸுடன் சந்திப்பு

இந்திய வெளிவிவகார அமைச்சர் எஸ்.ஜெய்சங்கரை, நேற்று வியாழக்கிழமை ருவாண்டாவில் வைத்து இலங்கையின் வெளியுறவு அமைச்சர் ஜி.எல்.பீரிஸ் சந்தித்தார்.

இந்தநிலையில், ஜி.எல்.பீரிஸுடன், நெருக்கடியால் பாதிக்கப்பட்ட இலங்கைக்கு இந்தியாவின் ஆதரவை பற்றி பேசியதாக ஜெய்சங்கர் ட்வீட் செய்துள்ளார்.

ருவாண்டாவின் கிகாலியில் நடைபெறும் பொதுநலவாய நாடுகளின் உச்சி மாநாட்டுக்கு புறம்பாக இந்த சந்திப்பு இடம்பெற்றுள்ளது.

A neighbors’ meeting with Prof. G.L. Peiris, FM of Sri Lanka on the margins of the Commonwealth Summit.

Talked about Commonwealth issues as well as India's support for Sri Lanka at this time. pic.twitter.com/PGsqmGMPu8

— Dr. S. Jaishankar (@DrSJaishankar) June 23, 2022