இது தோல்வியடைந்த அரசாங்கம்! கிளிநொச்சியில் சிறீதரன் தெரிவிப்பு

தமிழ், சிங்கள மக்களை வதைத்து அதன் ஊடாக தமது குடும்ப நலனை கொண்டிருக்கின்ற ஒரு அரசாங்கமாக தற்போதைய அரசாங்கம் உள்ளது என நாடாளுமன்ற உறுப்பினர் எஸ்.சிறீதரன் தெரிவித்துள்ளார்.

கிளிநொச்சியில் அமைந்துள்ள அவரது அலுவலகத்தில் இன்று முற்பகல் ஊடகவியலாளர் சந்திப்பொன்று இடம்பெற்றிருந்தது.

இதில் கலந்து கொண்டு கருத்து தெரிவிக்கும் போதே அவர் இந்த விடயத்தை கூறியுள்ளார். 

இதன்போது அவர் மேலும் கூறுகையில்,

எரிபொருள் தட்டுப்பாடு என்பது இந்த அரசாங்கத்தின் இயலாமையையும், வலு குன்றிய நிலையையும், திட்டமிடப்படாத பொருளாதார சிந்தனைகளை கொண்ட, இராணுவ சிந்தனைகளோடு மட்டுமிருக்கின்ற இராணுவ தலைவராக இருந்த கோட்டபாயவின் தோற்றுப்போன மனநிலையையும் இந்த உலகில் காட்டி நிற்கின்றது. 

கிளிநொச்சி மாவட்டத்தில் உள்ள பெரும்பாலான மக்கள் விவசாயத்தையே பொருளாதாரமாகவும், ஜீவனோபாயமாகவும் கொண்டு செல்கின்றனர்.

அதிலும் குறிப்பாக வடக்கு, கிழக்கு மாகாணங்களில் நெற்செய்கை பெருமளவில் மேற்கொள்ளப்படுகின்றது. இவ்வாறு மேற்கொள்ளப்பட்ட காலபோக நெற்செய்கையினால் விவசாயிகள் பாதிக்கப்பட்டுள்ளனர்.

இயற்கை விவசாயத்திற்கு செல்லுங்கள் என ஒரே இரவிலேயே இந்த அரசாங்கம் அறிவித்ததன் காரணமாக இம்முறை அறுவடை மிகப்பெரும் பின்னடைவை சந்தித்திருக்கின்றது.

இதனால் ஏக்கருக்கு 50 மூடைகளை பெற்றுக் கொண்ட வயல் நிலங்களில் ஏக்கருக்கு 5, 7, 10 மூடைகளாகவே அறுவடை மேற்கொள்ளப்பட்டுள்ளது.

இதனை அடுத்து இயற்கை உரத்துடன் சிறுபோக செய்கையை மேற்கொள்வதற்கு உழுது தயாரான பொழுது இங்கு டீசல் எனும் எரிபொருள் தடையாக இருக்கின்றது.

அரசாங்கத்திடமிருந்து அவர்களிற்கான எரிபொருள் கிடைக்காத காரணத்தால் கிளிநொச்சியில் பல எரிபொருள் நிரப்பு நிலையங்களில் மக்கள் வரிசையில் நெறிவதை நாங்கள் பார்க்கின்றோம்.

இது அவர்களை பொறுத்தவரையில் பொருளாதாரத்தில் மற்றுமொரு அடியாக விழுந்திருக்கின்றது.

இவ்வாறான நிலையில் தாம் பொருளாதார ரீதியில் பாதிக்கப்பட்டுள்ளதாக விவசாயிகள் கவலை வெளியிடுகின்றனர். இந்த அரசாங்கம் தோல்வியடைந்த அரசாங்கம்.

அவர்கள் தமிழ், சிங்கள மக்களை வதைத்து அதன் ஊடாக தமது குடும்ப நலனை கொண்டிருக்கின்ற ஒரு அரசாங்கமாக உள்ளது.

அந்தவகையில் இந்த அரசாங்கத்தின் செயற்பாடுகள், கோட்டபாயவின் நடவடிக்கைகள் தமது பொருளாதாரத்தில் பின்னடைவுகளை ஏற்படுத்தியுள்ளதாக விவசாயிகள் சோகமான கதைகளை சொல்கின்றார்கள்.

தனியார் ஊடாக உரத்தினை இறக்குமதி செய்ய அனுமதித்துள்ளதாக அரசாங்கம் சொல்கின்ற போதும், இங்கு தமிழ் மக்கள் உரத்தினை பெற்றுக் கொள்ளவோ அல்லது காணவோ முடியாத நிலையிலேயே உள்ளனர்.

ஆகவே இது மிகப்பெரிய பின்னடைவையும், இந்த மக்களிற்கு ஏமாற்றத்தையும் கொடுத்திருக்கின்றது.

சர்வதேச நாணய நிதியம் மற்றும் உலக வங்கியுடன் தாங்கள் பேசிக்கொண்டிருப்பதாக நிதியமைச்சர் நேற்றைய தினம் தெரிவித்திருக்கின்றார்.

சர்வதேச நாணய நிதியத்துடன் நாங்கள் பேசமாட்டோம் என்று அவர்கள் பல தடவை கூறியிருக்கின்றார்கள். இப்பொழுது அந்த நிலைமைக்கு இறங்கி வந்திருப்பது கூட அவர்களது இயலாமையின் அடுத்தக்கட்ட வெளிப்பாட்டை கொண்டு வந்திருக்கின்றது என குறிப்பிட்டுள்ளார்.