லங்காசிறி FM
தமிழ் சமூகத்துடன் கனடா தொடர்ந்தும் பயணிக்கும்: உறுதிமொழி வழங்கிய ஜஸ்டின் ட்ரூடோ
இலங்கை தமிழர்களின் மனித உரிமைகளுக்கு எதிராக செயற்பட்டவர்களுக்கு கனடா அரசு தடை விதித்துள்ளதுடன் தமிழ் சமூகத்துடன் கனடா தொடர்ந்தும் பயணிக்கும் என கனேடியப் பிரதமர் ஜஸ்டின் ட்ரூடோ உறுதியளித்துள்ளார்.
தைப்பொங்கல் நிகழ்வொன்றில் பங்கேற்றபோதே அவர் மேற்கண்டவாறு குறிப்பிட்டுள்ளார்.
தமிழர்களின் பங்களிப்பு
இது தொடர்பில் மேலும் கூறுகையில்,
“1983ஆம் ஆண்டு இலங்கையில் வன்முறைகள் ஆரம்பித்த காலத்தில் எனது தந்தையாரின் தலைமையிலான லிபரல் கட்சி 1800 இலங்கை தமிழர்களை கனடாவில் குடியேற்றியது.
இந்த தொகை கடந்த பல தசாப்தங்களில் அதிகரித்து இன்று புலம்பெயர்ந்த தமிழர்கள் அதிகமாக வசிக்கும் நாடாக கனடா பார்க்கப்படுகிறது.
அத்துடன் கனடாவின் வளர்ச்சிக்கு தமிழர்களின் பங்களிப்பு வியக்கத்தக்கது. இதன் காரணமாகவே, 2016ஆம் ஆண்டு, ஜனவரி மாதத்தை தமிழர் வரலாற்று மாதமாக கனேடிய அரசாங்கம் பிரகடனம் செய்தது.
மனித உரிமைகளுக்கு எதிராக செயற்பட்டவர்கள்
இலங்கை தமிழர்களின் நீதி, பொறுப்புக்கூறல் மற்றும் நல்லிணக்கம் தொடர்பில் கனடா தொடர்ந்தும் சர்வதேச மனித உரிமைகள் மற்றும் ஏனைய அமைப்புகளுடன் செயற்பட்டு வருகிறது.
அத்துடன் வேறு எந்த நாடும் நடைமுறைப்படுத்தாத வகையில் இலங்கை தமிழர்களின் மனித உரிமைகளுக்கு எதிராக செயற்பட்டவர்களுக்கு கனடா தடை விதித்துள்ளது. இந்த செயற்பாடுகள் தொடரும், தமிழ் சமூகத்துடன் கனடா தொடர்ந்தும் பயணிக்கும்” என ட்ரூடோ உறுதியளித்துள்ளார்.
| நாட்டு நடப்புகளை உங்கள் கைபேசியில் பெற்றுக்கொள்ள தமிழ்வின் WHATSAPP CHANNEL இல் இணையுங்கள் JOIN NOW |
அனலைதீவு 3ம் வட்டாரம், புங்குடுதீவு 5ம் வட்டாரம், Bünde, Germany, Selm, Germany
11 Jul, 2024
