குகைக்குள் கைக்குழந்தையுடன் சிக்கிய காணாமல்போன சிறுமி! அமைச்சர் எடுத்துள்ள அவசர நடவடிக்கை

நக்கிள்ஸ் பகுதியில் குகை ஒன்றில் இரண்டு மாத குழந்தையுடன் வசித்துவந்த 15 வயது சிறுமியின் எதிர்கால நல்வாழ்வை உறுதி செய்ய அரச தரப்பிலிருந்து தேவையான அனைத்து தலையீடுகளையும் உடனடியாகவும் தொடர்ச்சியாகவும் செயல்படுத்துமாறு மகளிர் மற்றும் சிறுவர் அலுவல்கள் அமைச்சர் சரோஜா சாவித்ரி போல்ராஜ் அதிகாரிகளுக்கு உத்தரவிட்டுள்ளார்.

இது தொடர்பில் சம்பந்தப்பட்ட துறைகளுக்கு அறிவுறுத்தப்பட்டுள்ளதாகவும் பெண்கள் மற்றும் குழந்தைகள் நல அமைச்சகம் தெரிவித்துள்ளது.

குகைக்குள் கைக்குழந்தையுடன் சிக்கிய சிறுமி

சுமார் 5 மாதங்களுக்கு முன்பு சிறுமி காணாமல்போனதாக அவரது குடும்பத்தினரால் உடுதும்பர பொலிஸில் முறைப்பாடு செய்யப்பட்டிருந்த நிலையில், குகைக்குள் இரண்டு மாத குழந்தையுடன் கண்டுபிடிக்கப்பட்டுள்ளார்.

இந்தச் சம்பவம் தொடர்பாக 23 வயதுடைய இளைஞரும், அவருக்கு உடந்தையாக இருந்ததாக கூறப்படும் உறவினர் ஒருவரும் பொலிஸாரால் கைது செய்யப்பட்டுள்ளனர்.  

இது தொடர்பில் அமைச்சர் வெளியிட்டுள்ள அறிக்கையில்,

நக்கிள்ஸ் பகுதியில் பாதுகாப்பற்ற பிரசவத்திற்கு பிறகு 15 வயது சிறுமி ஒரு குழந்தையுடன் கண்டெடுக்கப்பட்ட சம்பவம், ஒரு தாயாக தனக்கு மிகவும் அதிர்ச்சியளிக்கும் செய்தி என்றும் கூறியுள்ளார்.

இந்த சம்பவம் ஒரு தனிப்பட்ட நிகழ்வாக கருதப்படவில்லை என்றும், தற்போதைய பொருளாதார, சமூக மற்றும் அரசியல் சூழல் உள்ளிட்ட பல்வேறு சிக்கல்களால் குழந்தைகள் பல்வேறு நிலைகளிலும் பல்வேறு வழிகளிலும் பாதுகாப்பின்மையை உணர்கிறார்கள் என்றும் அமைச்சர் சுட்டிக்காட்டுகிறார்.

மேலும், பெற்றோருக்கும் குழந்தைகளுக்கும் இடையிலான பரஸ்பர தொடர்பு மற்றும் தகவல் பரிமாற்றம் படிப்படியாகக் குறைவதும் இதுபோன்ற சம்பவங்களுக்கு ஒரு முக்கிய காரணியாகக் காணப்படுகிறது என்றும் குறிப்பிட்டுள்ளார்.

இதன் காரணமாக, குழந்தைகளுக்கு மிகவும் பாதுகாப்பானதாக இருக்க வேண்டிய அவர்களின் நெருங்கிய சூழலிலேயே அவர்கள் பாதுகாப்பின்மையை உணரும் போக்கு ஏற்பட்டுள்ளது என்றும் அமைச்சர் சுட்டிக்காட்டியுள்ளார்.

பெற்றோர் கவனத்திற்கு

சூழ்நிலைகள் எப்படி இருந்தாலும், அனைத்துப் பெற்றோர்களும் தங்கள் குழந்தைகளிடம், "பெற்றோருடன் அவர்கள் பாதுகாப்பாக இருக்கிறார்கள்" என்ற அசைக்க முடியாத நம்பிக்கையை உருவாக்கப் பாடுபட வேண்டும் என்றும் அவர் வலியுறுத்தியுள்ளார்.

குடும்பத்திற்குள் அத்தகைய பாதுகாப்பான சூழலையும் வெளிப்படையான உரையாடலையும் உருவாக்குவதன் மூலம், இதுபோன்ற ஆபத்தான மற்றும் அதிர்ச்சியூட்டும் சம்பவங்கள் நிகழ்வதை பெருமளவில் குறைக்க முடியும் என்றும் அமைச்சர் கூறியுள்ளார்.

இத்தகைய சூழ்நிலைகளில் பாதிக்கப்படக்கூடியவர்களாக அல்லது பாதுகாப்பின்மையுடன் இருப்பவர்களுடன் நேரடியாகவோ அல்லது மறைமுகமாகவோ தொடர்புகொண்டு தலையிடும் அனைத்துத் தரப்பினரும், அத்துடன் அரச நிறுவனங்களும், மக்களுக்கு நெருக்கமான, எளிதில் அணுகக்கூடிய மற்றும் அதிக நம்பிக்கைக்குரிய நிறுவனங்களாக மாற வேண்டும் என்ற செய்தியை இந்த சம்பவம் எடுத்துக்காட்டுவதாகவும் தெரிவித்துள்ளார்.

நாட்டின் குழந்தைகள் மீது அனைத்து குடிமக்களும் அதிக உணர்வுடனும் கவனத்துடனும் இருக்குமாறு அமைச்சர் சரோஜா சாவித்ரி பவுல்ராஜ் கேட்டுக்கொண்டுள்ளார்.  

இலங்கையில் சினிமாவை மிஞ்சிய திகில் சம்பவம்! குகைக்குள் கைக்குழந்தையுடன் சிக்கிய சிறுமி

இலங்கைக்கு கிழக்கே மீண்டும் உருவாகும் புயல்! பொதுமக்களுக்கு விடுக்கப்பட்டுள்ள சிவப்பு எச்சரிக்கை