சரித்திரத்தின் பக்கங்களில் இன்னொரு மார்கரெட் தாட்சராக-லிஸ் டிரஸ்!

பிரித்தானியாவின் பெண் பிரதமர்களின் வரிசையில் மார்கரெட் தாட்சர், தெரசா மே ஆகியோரைத் தொடர்ந்து பிரித்தானியாவின் மூன்றாவது பெண் பிரதமர் என்ற பெருமையைப் பெற்றுள்ளார் லிஸ் டிரஸ்.

பிரித்தானிய பிரதமராக இருந்த போரிஸ் ஜான்சன் பதவி விலகுவதாக அறிவித்ததைத் தொடர்ந்து புதிய பிரதமர் தெரிவுக்கான தேர்தல் நடைபெற்றது.

போரிஸ் ஜான்சனின் கன்சர்வேட்டிவ் கட்சியின் ரிஷி சுனக் மற்றும் லிஸ் டிரஸ் ஆகியோர் புதிய பிரதமருக்கான போட்டியில் பங்கேற்றனர்.

தற்போது இந்திய வம்சாவளியைச் சேர்ந்த ரிஷி சுனக்கை 20 ஆயிரம் வாக்குகள் வித்தியாசத்தில் வீழ்த்தி பிரித்தானியாவின் அடுத்த பிரதமராக தேர்வாகி உள்ளார் லிஸ் டிரஸ்.

யார் இந்த லிஸ் டிரஸ்

1975 ஆம் ஆண்டு ஆக்ஸ்போர்டில் பிறந்தவர் தான் லிஸ் டிரஸ். இவரது இயற்பெயர் மேரி எலிசபெத் டிரஸ் என்பதாகும்.

இவரது தந்தை கணிதப் பேராசிரியராகவும், தாயார் செவிலியராகவும் பணியாற்றியவர்கள்.

லீட்ஸில் உள்ள ரௌண்ட் ஹே பள்ளியில் பயின்ற டிரஸ், ஆக்ஸ்போர்டு பல்கலைக்கழகத்தில் தத்துவம், அரசியல் மற்றும் பொருளாதாரத்தில் பட்டம் பெற்றுள்ளார்.

திருமணம்

பட்டப்படிப்புக்கு பிறகு பிரபலமான நிறுவனங்களில் கணக்காளராகப் பணிபுரிந்துள்ளார்.

நிறுவனத்தில் தன்னுடன் சக கணக்காய்வாளராக பணிப்புரிந்த ஹக் ஓ லியரியை 2000 ஆம் ஆண்டு திருமணம் செய்துள்ளார். இத்தம்பதியருக்கு இரண்டு குழந்தைகள் உள்ளனர். 

அரசியல் பிரவேசம்

கல்லூரியில் படிக்கும் போதே அரசியலில் அடியெடுத்து வைத்தவர் தான் டிரஸ், ஆரம்பத்தில் லிபரல் டெமாக்ரட்டுகளுக்கு ஆதரவாகத் தீவிர பிரசாரம் மேற்கொண்டார். 1994 இல் நடைபெற்ற கட்சி மாநாட்டில், முடியாட்சியை ஒழிப்பதற்கு ஆதரவாக பேசி அதிர்வலையை ஏற்படுத்தினார்.

பின்னர் ஆக்ஸ்போர்டு பல்கலைக்கழகத்தில் கற்றபோது அவர் கன்சர்வேடிவ் கட்சிக்கு மாறினார். 2001 பொதுத் தேர்தலில் வெஸ்ட் யார்க் ஷயர் ஹெம்ஸ்வொர்த் தொகுதியில் டோரி கட்சி வேட்பாளராக களம் கண்டு தோல்வியடைந்தார்.

2005 இல் வெஸ்ட் யார்க் ஷயரின் கால்டர் வேலியிலும் அவருக்கு தோல்விதான் கிடைத்தது. ஆனாலும் மனம் தளராத லிஸ் டிரஸ், 2006 இல் தென்கிழக்கு லண்டன் பகுதியில் உள்ள கிரீன்விச்சின் கவுன்சிலராகத் தேர்ந்தெடுக்கப்பட்டார்.

பிரித்தானிய நாடாளுமன்றத்திற்குள் போக வேண்டும் என்ற அவரது கனவு, 2010 இல் நிறைவேறியது.

பிரித்தானிய நாடாளுமன்றத்திற்குள்  சென்ற இரண்டே ஆண்டுகளில் கல்வி அமைச்சராகவும், 2014 இல் சுற்றுச்சூழல் செயலாளராகவும் பதவி உயர்வு பெற்றார்.

பிரதமர் தெரசா மேயின் தலைமையிலான ஆட்சியில் நிதித் துறை முதன்மைச் செயலராகப் பொறுப்பு வகித்தவர், நீதித் துறை செயலாளராகவும் பணியாற்றி உள்ளார். 2019 இல் போரிஸ் ஜான்சன் பிரதமரானபோது, சர்வதேச வர்த்தகச் செயலாளராக டிரஸ் பொறுப்பேற்றார்.

2021 இல் வெளியுறவுத் துறை அமைச்சரான லிஸ் டிரஸ் தற்போது பிரித்தானியாவின் மூன்றாவது பெண் பிரதமர் என்ற பெருமையை பெறுகிறார்.

பிரித்தானியாவின் இரும்பு பெண்மணி என வரலாற்றில் நிலை பெற்றுவிட்ட மார்கரெட் தாட்சர் போல தனக்கு ஏழு வயதாக இருக்கம் போது பாடசாலையில் நடந்த மாதிரி பொது தேர்தல் ஒன்றில் பிரித்தானியாவின் முதல் பெண் பிரதமதரான மார்கரெட் தட்சர் போன்று பாவனை செய்து போட்டியிட்டதாக லிஸ் டிரஸ் தனது பிரச்சாரத்தின் போது தெரிவித்திருந்தார்.

எனினும் அவரைப் போன்று வெற்றியீட்ட முடியவில்லையெனவும் தனது தேர்தல் பிரசார மேடையில் தெரிவித்துள்ளார்.

இருப்பினும் விடா முயற்சி காரணமாக முப்பத்தொன்பது ஆண்டுகளுக்குப் பிறகு, இரும்புப் பெண்மணியென அழைக்கப்பட்ட மார்கரெட் தட்சர் வழியைப் பின்பற்றி கன்சர்வேடிவ் கட்சியின் தலைவராகவும் பிரதமராகவும் வெற்றி வாகை சூடியுள்ளார்.

சரித்திரத்தின் பக்கங்களில் இன்னொரு மார்கரெட் தாட்சராக லிஸ் டிரஸ் உருவெடுப்பாரா? என்ற பதிலுக்கு காலமும் உலகமும் காத்திருக்கிறது.