தமிழர் பகுதியில் மாணவர்களின் கல்விக்கு அச்சுறுத்தல்! வகுப்பறை மீது காடையர்கள் அட்டகாசம்

கந்தளாய்- பேராற்றுவெளி பகுதியில் தனியார் வகுப்பறை மீது இனந்தெரியாத நபர்கள் தாக்குதல் நடத்தி, கல்வி உபகரணங்களைச் சேதப்படுத்தியுள்ளதாகப் பிரதேச மக்கள் தெரிவிக்கின்றனர்.

மாணவர்கள் நீண்ட தூரம் பயணித்து கல்வி கற்க வேண்டிய சிரமத்தைத் தவிர்க்கும் நோக்கில், பேராற்றுவெளி சமூக நலன்புரிச் சங்கத்தினால் பேராற்றுவெளி சாஹிரா பாடசாலைக்கு அருகாமையில் இந்தத் தனியார் வகுப்புகள் ஏற்பாடு செய்யப்பட்டிருந்தன.

மாணவர்களின் எதிர்காலத்தைக் கருத்திற்கொண்டு முன்னெடுக்கப்பட்ட இம்முயற்சிக்கு இடையூறு ஏற்படுத்தும் வகையில் இடம்பெற்றுள்ள இச்சம்பவம், அப்பகுதி மக்களிடையே கடும் அதிருப்தியை ஏற்படுத்தியுள்ளது.

உரிய விசாரணை

கடந்த ஆண்டும் குறித்த வகுப்பறையில் இருந்த கல்வி உபகரணங்கள் சேதப்படுத்தப்பட்டதாகத் தெரிவிக்கப்படுகிறது.

இது தொடர்பாகப் பொலிஸாருக்கு முறைப்பாடு செய்யப்பட்டிருந்த நிலையில், பொலிஸார் சம்பவ இடத்திற்கு வந்து பார்வையிட்டதைத் தவிர, உரிய நடவடிக்கைகள் எதுவும் முன்னெடுக்கப்படவில்லை எனப் பிரதேச மக்கள் குற்றஞ்சாட்டுகின்றனர்.

இவ்வாறான சம்பவங்கள் தொடர்வதாகக் கூறப்படும் நிலையில், சம்பந்தப்பட்டவர்களுக்கு எதிராக இதுவரை ஏன் உரிய நடவடிக்கைகள் எடுக்கப்படவில்லை என்ற கேள்வியும் மக்கள் மத்தியில் எழுந்துள்ளது.

மாணவர்களின் கல்விக்காக அமைக்கப்பட்ட வகுப்பறைக்கே பாதுகாப்பு இல்லையா, கல்வி உபகரணங்களைச் சேதப்படுத்துவோருக்கு எதிராக நடவடிக்கை எடுக்கப்படுவது எப்போது எனக் கேள்வி எழுப்பும் பிரதேச மக்கள், சம்பந்தப்பட்ட அதிகாரிகள் உடனடியாகத் தலையிட்டு உரிய விசாரணைகளை முன்னெடுத்து, மாணவர்களின் கல்விச் செயற்பாடுகளுக்குப் பாதுகாப்பை உறுதிப்படுத்த வேண்டும் என வலியுறுத்துகின்றனர்.

அம்பத்தலை- பியகம நீர் சுத்திகரிப்பு நிலைங்களின் செயற்பாடு இடைநிறுத்தம்! வெளியான முக்கிய அறிவிப்பு

திருகோணமலை- கண்டி வீதியில் பேருந்து தரிப்பிடம் இன்றி மக்கள் அவதி