32 சீன நாட்டவர்கள் தங்கியிருந்த ஹோட்டலில் அதிரடி சோதனை - 23 கணினிகள் பறிமுதல்

இணையவழி நிதி மோசடி மற்றும் சட்டவிரோத வணிக நடவடிக்கைகள் தொடர்பான சந்தேகத்திற்கிடமான தகவலின் அடிப்படையில், பாணந்துறை பகுதியில் தங்கியிருந்த 32 சீன நாட்டவர்கள் பொலிஸாரால் சோதனைக்குட்படுத்தப்பட்டுள்ளதாக தெரிவிக்கப்பட்டுள்ளது.

இதற்கமைய,   பாணந்துறை பிரதேச குற்றப் புலனாய்வுப் பிரிவின் அதிகாரிகளால், நல்லோர்வ பகுதியில் உள்ள ஒரு தங்கும் விடுதியில் நவம்பர் 6 மற்றும் 7 ஆகிய திகதிகளில் இந்தச் சோதனை நடவடிக்கைகள் முன்னெடுக்கப்பட்டுள்ளன.

சட்டவிரோத இணையவழி நடவடிக்கைகள்

விடுதியில் தங்கியிருந்த சீன நாட்டு குழுவினர் சட்டவிரோத இணையவழி நடவடிக்கைகள் அல்லது நிதி மோசடிகளில் ஈடுபட்டிருக்கலாம் என்று பனதுரா பிரதேச பொறுப்பு சிரேஷ்ட பொலிஸ் கண்காணிப்பாளருக்குக் கிடைத்த தகவலின் அடிப்படையிலேயே இவ்வாறு சோதனையிடப்பட்டுள்ளது.

இந்த நடவடிக்கையை நடத்துவதற்கு முன்னர் பொலிஸார் பனதுரா நீதவான் நீதிமன்றத்திலிருந்து சோதனை நடவடிக்கைகளுக்கான முன்அனுமதியினை பெற்றிருந்தார்கள் என்றும், குறித்த விசாரணைக்கு குற்றப் புலனாய்வுத் துறை (CID), பொலிஸ் சிறப்பு அதிரடிப் படை (STF), குற்றப் பதிவேடுகள் பிரிவு, பொலிஸ் நாய்கள் பிரிவு மற்றும் உத்தியோக மொழிகள் திணைக்களம் ஆகியவை ஆதரவளித்துள்ளன என்றும் கூறப்படுகின்றது.

இதன்போது, தங்கும் விடுதியில் தங்கியிருந்த 32 சீன நாட்டினரை பொலிஸார் கண்டறிந்து, மேலதிக பரிசோதனைக்காக 23 கணினிகள் மற்றும் அது தொடர்பான உபகரணங்களைப் பறிமுதல் செய்துள்ளனர்.

CID மேலதிக விசாரணைகள்

ஏதேனும் குற்றச் செயல்கள் நடந்துள்ளனவா என்பதை விசாரணையாளர்கள் கண்டறியும் நோக்கில், அந்த உபகரணங்கள் பனதுறை தெற்கு பொலிஸ் நிலையத்திற்குக் கொண்டு செல்லப்பட்டதாக பொலிஸார் தெரிவித்துள்ளனர்.

குற்றப் புலனாய்வுத் துறை (CID) மேலதிக விசாரணைகளை மேற்கொண்டு வருகிறது.

இதற்கிடையில், இலங்கையில் ஹோட்டல்கள், விருந்தினர் இல்லங்கள், ரிசார்ட்டுகள் மற்றும் பிற தங்குமிட வசதிகளிலிருந்து செயல்படும் வெளிநாட்டுக் குழுக்கள் சம்பந்தப்பட்ட பல நிதி மோசடி வழக்குகள் அண்மைய மாதங்களில் கண்டறியப்பட்டுள்ளதாக பொலிஸார் எச்சரித்துள்ளனர்.

தங்குமிட வழங்குநர்கள் விழிப்புடன் இருக்குமாறும், சந்தேகத்திற்கிடமான நடவடிக்கைகளைப் முறைப்பாடளிக்குமாறு கேட்டுக்கொள்ளப்பட்டுள்ளனர்.

மேலும், 118 அல்லது 119 என்ற அவசர உதவி எண்கள் மூலமாகவோ அல்லது அருகிலுள்ள பொலிஸ் நிலையத்தைத் தொடர்புகொள்வதன் மூலமாகவோ தகவல்களை வழங்குமாறு பொலிஸ் பொதுமக்களைக் கேட்டுக்கொண்டுள்ளது.

வெளிநாட்டிலிருந்து இலங்கை வந்த தமிழ் பெண்ணுக்கு நேர்ந்த அவலம் - சதித்திட்டம் விசாரணையில் அம்பலம்

யாழில் பொதுமக்களை வழிமறித்து பணம் பறிக்கும் மர்ம நபர் - பொலிஸாரின் அசமந்த போக்கால் தொடரும் அட்டூழியம்