லங்காசிறி FM
நாம் நீலகாமம்! கொழும்பில் நாளை மாபெரும் அறவழிப் போராட்டம்
இரத்தினபுரி - காவத்தை, நீலகாமம் தோட்டத்தில் அரங்கேறிய வன்முறை சம்பவத்தைக் கண்டித்தும், மலையக மக்களுக்கான காணி உரிமையை வலியுறுத்தியும் கொழும்பில் “நாம் நீலகாமம்” எனும் தொனிப்பொருளில் அறவழிப் போராட்டம் ஒன்று இடம்பெறவுள்ளது.
குறித்த கவனயீர்ப்புப் போராட்டம் நாளை(05.05.2026) கொழும்பு ஐந்துலாம்பு சந்தியில் முற்பகல் 11 மணிக்கு ஆரம்பமாகும் என ஏற்பாட்டுக்குழு அறிவித்துள்ளது.
பாதிக்கப்பட்ட மக்களுக்கான நீதி
நீலகாமம் தோட்டத்தில் அமைக்கப்பட்டிருந்த தற்காலிக தொழிலாளர் குடியிருப்பொன்றைப் பிரத்தியேகப் பாதுகாப்பு படையைக் கொண்ட தோட்ட நிர்வாகத்தினரால் அண்மையில் அடித்து நொறுக்கப்பட்ட சம்பவம் ஒட்டுமொத்த மலையகத்திலும் பெரும் அதிர்வலைகளை ஏற்படுத்தியது.
அத்துடன், கறுப்பு ஆடை அணிந்துகொண்டு, முகத்தைமூடும் வகையிலான தலைக்கவசத்தையும் அணிந்துகொண்டு தோட்டத்துக்குள் புகுந்த கும்பல், வன்முறையைக் கையாண்டு வீட்டை அடித்து நொறுக்கியது.
நாட்டில் சட்டவிதி முறைகளை கையாள்வதற்கு பொலிஸார் இருக்கையில், தண்டனை வழங்க நீதிமன்றம் செயற்படுகையில் பிரத்தியேக பாதுகாப்பு குழு, சட்டத்தை கையில் எடுத்தமை அடக்குமுறையின் உச்ச கட்டமாவதுடன் ஜனநாயக விரோதச் செயல் எனப் பலரும் சுட்டிக்காட்டி வருகின்றனர்.
இந்நிலையில், நீலகாமம் வன்முறைச் சம்பவத்தைக் கண்டித்தும், பாதிக்கப்பட்ட மக்களுக்கு நீதி கோரியும் “நாம் மலையகம்“அமைப்பின் ஏற்பாட்டில் நீலகாமம் தோட்டத்தில் கலந்துரையாடலொன்று நடைபெற்றது.
இதன்போது “நீலகாமம்” பிரகடனம் நிறைவேற்றப்பட்டது. இவ்வாறானதொரு பின்புலத்திலேயே மலையக மக்களின் அரசியல், பொருளாதார மற்றும் சமூக விடுதலையின் முக்கிய அங்கமான காணி உரிமையை வென்றெடுக்கும் நோக்கிலும், நீலகாமம் மக்களுக்கு நீதி கோரியும், பெருந்தோட்டப் பகுதிகளுக்கு கூலிப்படை வேண்டாம் என வலியுறுத்தியும் இந்த அறவழிப் போராட்டமானது ஏற்பாடு செய்யப்பட்டுள்ளது.
இந்தப் போராட்டத்திற்கு மலையக சிவில் அமைப்புகள், பல்கலைக்கழக மாணவர் ஒன்றியங்கள், வர்த்தக சங்கங்கள், ஊடக அமைப்புகள், தொழிலாளர் அமைப்புகள் மற்றும் தொழிற்சங்கங்கள் எனப் பல தரப்பினரும் ஆதரவு தெரிவித்துள்ளனர்.
புங்குடுதீவு 8ம் வட்டாரம், கொழும்பு, முல்லைத்தீவு, Den Helder, Netherlands
10 May, 2020
யாழ் சண்டிலிப்பாய் வடக்கு, Jaffna, நல்லூர், திருநெல்வேலி, யாழ்ப்பாணம், கனடா, Canada
02 May, 2021
