புதிய பயங்கரவாத எதிர்ப்பு சட்டமூலம் மிகவும் ஆபத்தானது – துமிந்த நாகமுவ

 புதிய பயங்கரவாத எதிர்ப்புச் சட்ட மூலம் மிகவும் ஆபத்தானது எனவும் மனித உரிமைகளை கடுமையாக பாதிக்கும் வகையிலானது எனவும் மக்கள் போராட்ட முன்னணியின் நிறைவேற்றுச் சபை உறுப்பினர் துமிந்த நாகமுவ தெரிவித்துள்ளார்.

அரசாங்கத்தினால் புதிதாக வர்த்தமானியில் வெளியிடப்பட்டுள்ள 'பயங்கரவாதத்திலிருந்து அரசினைப் பாதுகாக்கும் சட்டமூலம்' மூலம் நாட்டின் மக்களின் அடிப்படை மனித உரிமைகள் கூட கடுமையாக மீறப்படுவதாக தெரிவித்துள்ளார்.

நுகேகொடையில் நடைபெற்ற விசேட ஊடகவியலாளர் சந்திப்பில் உரையாற்றிய போது அவர் இதனைத் தெரிவித்துள்ளார்.

தேர்தல் காலத்தில் அளித்த வாக்குறுதிகளை மறந்து, தற்போதைய ஆட்சி முந்தைய சட்டங்களை விட ஆபத்தான அடக்குமுறைச் சட்டத்தைக் கொண்டு வர ஆயத்தமாகி வருவதாகக் கூறியுள்ளார்.

பல்வேறு தசாப்தங்களாக அரசியல் செயற்பாட்டாளர்கள் மற்றும் சிவிலியன்களை அடக்குவதற்குப் பயன்படுத்தப்பட்ட பயங்கரவாதத் தடைச் சட்டத்தை நீக்குவதாக தேசிய மக்கள் சக்தி தேர்தல் மேடைகளில் தொடர்ச்சியாக வாக்குறுதி அளித்திருந்ததாக அவர் சுட்டிக்காட்டியுள்ளார்.

எனினும், தற்போது அந்தச் சட்டத்தை நீக்குவதாகக் கூறிக்கொண்டு, மக்களின் உரிமைகளை மேலும் கட்டுப்படுத்தும் புதிய சட்டமூலத்தை நிறைவேற்ற முயற்சி நடப்பதாகக் குற்றம் சுமத்தியுள்ளார்.

புதிய சட்டமூலத்தில், அரசாங்கம் அல்லது ஏதேனும் சர்வதேச அமைப்பு ஒரு தீர்மானத்தை எடுப்பதற்கு அல்லது எடுக்காமல் இருப்பதற்கு அழுத்தம் கொடுப்பது கூட 'பயங்கரவாதச் செயல்' என வரைவிலக்கணம் செய்யப்படக்கூடிய வகையில் சட்டங்கள் உருவாக்கப்பட்டுள்ளதாகத் தெரிவித்துள்ளார்.

அரசாங்கத்திடம் வரியைக் குறைக்குமாறு யாராவது கோரினால், அல்லது சர்வதேச நாணய நிதியத்தின் நிபந்தனைகளுக்கு எதிராகக் குரல் கொடுத்தால், அந்த நியாயமான எதிர்ப்பைக் கூட பயங்கரவாதச் செயலாக மாற்றும் அபாயம் இதில் உள்ளது என தெரிவித்துள்ளார்.

சாதாரண ஆர்ப்பாட்டங்கள் மற்றும் எதிர்ப்புகளை அடக்குவதற்கு இதுவரை பயன்படுத்தப்பட்ட பொதுச் சொத்துச் சட்டத்தின் விடயங்கள் கூட பயங்கரவாதக் குற்றங்களாகக் குறிப்பிடப்பட்டு இந்த புதிய சட்டமூலத்தில் சேர்க்கப்பட்டுள்ளன என அவர் குறிப்பிட்டுள்ளார்.

தடுப்புக் காவல் உத்தரவுகளில் கையெழுத்திடும் அதிகாரத்தை பாதுகாப்பு அமைச்சின் செயலாளருக்கு வழங்கத் திட்டமிட்டுள்ளமை ஜனநாயகக் கொள்கைகளுக்கு முரணானது எனத் தெரிவித்துள்ளார்.

மேலும், சட்டமூலத்தின் 51 வது பிரிவின் மூலம் பொலிஸார் ஆர்ப்பாட்டங்களைத் தடைசெய்யும் உத்தரவுகளைப் பெறுவதற்கான வசதிகள் செய்யப்பட்டுள்ளதாகவும், இதன் மூலம் பிரஜைகளின் எதிர்ப்புத் தெரிவிக்கும் அடிப்படை உரிமை முற்றிலும் நசுக்கப்படுவதாகவும் அவர் சுட்டிக்காட்டியுள்ளார்.

மேலும், இராணுவத்தினர், பொலிஸார் மற்றும் கடலோரக் காவல் படையினருக்கு எந்த நேரத்திலும் சோதனைகளை நடத்துவதற்கு பரந்த அதிகாரங்கள் வழங்கப்படுவதாகவும், 66 வது பிரிவின் கீழ் இச்செயல்கள் 'நன்னம்பிக்கையுடன் செய்யப்பட்டவை' எனக் கருதப்பட்டு சட்ட விலக்களிப்பு வழங்கப்படுவதால், பாதுகாப்புத் படையினரின் தவறுகளுக்கு எதிராக அடிப்படை உரிமை வழக்கைக் கூட தாக்கல் செய்ய முடியாத நிலை ஏற்படும் என்றும் அவர் எச்சரித்துள்ளார்.

ஜனாதிபதியின் விருப்பத்தின் பேரில் அமைப்புகளைத் தடை செய்யும் அதிகாரமும் தன்னிச்சையாகப் பயன்படுத்தப்படலாம் என அவர் மேலும் தெரிவித்துள்ளார்.

மக்கள் மீது சுமத்தப்படும் அதிக வரிகள் மற்றும் பொருளாதார நெருக்கடிகளுக்கு மத்தியில் எதிர்காலத்தில் ஏற்படக்கூடிய மக்கள் எழுச்சிகளை அமைதிப்படுத்துவதற்காக இத்தகைய கொடூரமான சட்டங்கள் முன்னரே தயாரிக்கப்பட்டு வருவதாக அவர் குற்றம் சாட்டியுள்ளார்.

இதேவேளை, தேசிய பாதுகாப்புத் தேவைகள் மற்றும் நவீன உலகில் உருவெடுக்கும் சிக்கலான பாதுகாப்புச் சூழ்நிலைகளை எதிர்கொள்ளும் வகையிலும், சர்வதேச மனித உரிமைகள் தரநிலைகளைக் கருத்தில் கொண்டும் இந்த புதிய சட்டமூலம் தயாரிக்கப்பட்டதாக அரசாங்கம் முன்னர் தெரிவித்திருந்தது.

எவ்வாறாயினும், வர்த்தமானி அறிவித்தல் வெளியானதைத் தொடர்ந்து சமூகத்தின் பல்வேறு தரப்பினரிடையே இது குறித்து விரிவான விவாதங்கள் உருவாகியுள்ளன எனவும், சட்டமூலம் நாடாளுமன்றத்தில் சமர்ப்பிக்கப்பட்ட பின்னர் அது தொடர்பில் நீதிமன்ற மற்றும் அரசியலமைப்பு ரீதியான நடவடிக்கைகளை எடுக்க சிவில் அமைப்புகள் தயாராகி வருவதாகவும் தகவல்கள் தெரிவிக்கின்றன.