பலாங்கொட கஸ்ஸப தேரர் உள்ளிட்ட ஐவருக்கு நீதிமன்றம் பிறப்பித்துள்ள அதிரடி உத்தரவு

அனுராதபுர புனித நகர மேம்பாட்டுத் திட்டத்திற்கு எதிராக அமர்ந்து போராட்டத்தில் ஈடுபட்டு வரும், பலாங்கொட கஸ்ஸப தேரர் உள்ளிட்ட ஐந்து பௌத்த பிக்குகளுக்கு, அனுராதபுர முதன்மை நீதவான் நீதிமன்றம் அழைப்பாணை பிறப்பித்துள்ளது.

அனுராதபுர முதன்மை நீதவான் சியாபத் சசிந்து விக்ரமரத்ன, குறித்த ஐந்து பிக்குகளையும் நவம்பர் 20ஆம் திகதி நீதிமன்றத்தில் முன்னிலையாகுமாறு இன்று(09.11.2026) உத்தரவிடப்பட்டுள்ளது.

பலாங்கொட கஸ்ஸப தேரர், கஹதாகஸ்திகிலியே விஜித்த தேரர், பலாங்கொட அனுருத்த தேரர், பிலிமதலாவே ரேவத தேரர் மற்றும் தெனியாயே சொரத தேரர் ஆகியோருக்கே இவ்வாறு அழைப்பாணை விடுக்கப்பட்டுள்ளது.

தானம் கொடுக்கும் இடத்தில் நடக்கும் போராட்டம்

அனுராதபுர புனித நகரத்திற்கான முன்மொழியப்பட்ட மேம்பாட்டுத் திட்டத்தை அரசாங்கம் கைவிட வேண்டும் என்று வலியுறுத்தி, இந்த பிக்குகள் ருவன்வெலிசாய வளாகத்திற்கு அருகில் அமர்ந்து போராட்டத்தில் ஈடுபட்டு வருகின்றனர்.

போராட்டத்தில் ஈடுபட்டுள்ள பிக்குகளின் சார்பில் முன்னிலையான சட்டத்தரணிகள், நவம்பர் 7ஆம் திகதி அனுராதபுர பொலிஸாரால் பெறப்பட்ட, போராட்ட இடத்திலிருந்து வெளியேறுமாறு பிக்குகளுக்கு உத்தரவிடும் தடையுத்தரவை நீக்குமாறு கோரி மனுவொன்றைத் தாக்கல் செய்ததைத் தொடர்ந்து, இந்த விவகாரம் நீதிமன்றத்தில் விசாரணைக்கு எடுத்துக்கொள்ளப்பட்டது.

பிக்குகளுக்காக முன்னிலையான சட்டத்தரணிகள் சமன் கலப்பத்தி மற்றும் கலிங்க ரவீந்திர கலிங்க ஆகியோர், பொலிஸார் நீதிமன்றத்தைத் தவறாக வழிநடத்தி இந்த உத்தரவைப் பெற்றுள்ளதாகக் குற்றம் சாட்டியுள்ளனர்.

இந்த எதிர்ப்புப் போராட்டம் ருவன்வெலிசாய முற்றத்திற்குள் அல்லாமல், “தன்சல” (தானம் வழங்கும் இடம்) நடத்தப்படும் பகுதியில் நடைபெறுவதாகவும், இது பொதுமக்களுக்கு எவ்வித இடையூறையும் ஏற்படுத்தவில்லை என்றும் அவர்கள் வாதிட்டுள்ளனர். மேலும், இந்தத் தடையுத்தரவு அரசியலமைப்பு உரிமைகளை மீறுவதாகக் குறிப்பிட்ட சட்டத்தரணிகள், அதனை ரத்து செய்யுமாறு நீதிமன்றத்தில் கோரிக்கை விடுத்துள்ளனர்.

தேரர்களுக்கு அழைப்பாணை உத்தரவு

இருப்பினும், அனுராதபுர தலைமையக பிரதம பொலிஸ் பரிசோதகர் ருக்மால் ரத்நாயக்க, இந்தப் போராட்டம் பொதுமக்களுக்கு அசௌகரியத்தை ஏற்படுத்துவது விசாரணைகள் மூலம் உறுதிப்படுத்தப்பட்டுள்ளதாக நீதிமன்றத்திற்குத் தெரிவித்துள்ளார்.

மேலும், போராட்ட இடத்திலிருந்து வெளியேறுமாறு நவம்பர் 7-ஆம் திகதி பிறப்பிக்கப்பட்ட நீதிமன்ற உத்தரவை பிக்குகள் பின்பற்றவில்லை என்றும், எனவே அவர்களை நீதிமன்றத்தில் முன்னிலையாகுமாறு அழைப்பாணை பிறப்பிக்கப்பட வேண்டும் என்றும் அவர் கோரிக்கை விடுத்துள்ளனர்.

இதனிடையே, போராட்ட இடத்தில் குழப்பத்தை ஏற்படுத்தியதாகவும் பொலிஸாரின் கடமைகளுக்கு இடையூறு விளைவித்ததாகவும் சந்தேகத்தின் பேரில் கைது செய்யப்பட்ட நபர் ஒருவர், மருத்துவ சட்ட பரிசோதனையின்படி, கைது செய்யப்பட்ட வேளையில் போதைப்பொருட்களின் செல்வாக்கின் கீழ் இருந்தமை கண்டறியப்பட்டுள்ளதாக பொலிஸார் நீதிமன்றத்திற்குத் தெரிவித்துள்ளனர்.

இரு தரப்பினரின் சமர்ப்பிப்புகளைக் கருத்தில் கொண்ட பின்னர், அந்த ஐந்து தேரர்களும் நவம்பர் 20 அன்று நீதிமன்றத்தில் முன்னிலையாகுமாறு உத்தரவிட்டு, தலைமை நீதவான் அவர்களுக்கு அழைப்பாணை உத்தரவு பிறப்பிக்கப்பட்டுள்ளது. 

தீபாவளி தினத்தில் கூரிய ஆயுதத்தால் தாக்கப்பட்டு இளைஞன் கொலை

டொலருக்கு நிகரான இலங்கை ரூபாயின் மதிப்பு மீண்டும் வீழ்ச்சி