யாழ். பல்கலை மாணவ குழுக்களுக்கிடையே வெடித்த மோதல்.. எடுக்கப்பட்டுள்ள அதிரடி நடவடிக்கை
யாழ்ப்பாணப் பல்கலைக்கழகத்தின் முகாமைத்துவ பீடத்தைச் சேர்ந்த இரு மாணவர் குழுக்களுக்கிடையே ஏற்பட்ட மோதல் குறித்து, பல்கலைக்கழக நிர்வாகம் உள்விசாரணை ஒன்றைத் தொடங்கியுள்ளதாகத் தெரிவித்துள்ளது.
பொலிஸார் மேற்கொண்டு வரும் விசாரணைகளுக்கு மேலதிகமாக, பல்கலைக்கழக நிர்வாகமும் இந்த விவகாரம் குறித்து விசாரணை நடத்தத் தொடங்கியுள்ளதாக யாழ்ப்பாணப் பல்கலைக்கழகத்தின் துணைவேந்தர், சிரேஷ்ட பேராசிரியர் திருநாவுக்கரசு வேல்நம்பி குறிப்பிட்டுள்ளார்.
இந்த மோதல், கடந்த 19ஆம் திகதி இரவு, முகாமைத்துவ பீடத்தின் இரண்டாம் மற்றும் மூன்றாம் ஆண்டு மாணவர்களுக்கு இடையே இடம்பெற்றுள்ளது. பல்கலைக்கழக மாணவர்கள் தங்கியிருந்த தனியார் தங்குமிடத்திலேயே இந்தச் சம்பவம் நிகழ்ந்துள்ளது.
மேலும் பலர் கைதாக வாய்ப்பு
இதில் காயமடைந்த மூன்று மாணவர்கள் சிகிச்சைக்காக யாழ்ப்பாண வைத்தியசாலையில் அனுமதிக்கப்பட்டுள்ளனர். இந்தச் சம்பவம் குறித்து கோப்பாய் பொலிஸார் விசாரணை நடத்தி வருகின்றனர்.

மோதலில் ஈடுபட்ட 21 மாணவர்கள் கைது செய்யப்பட்டு, யாழ்ப்பாண நீதவான் நீதிமன்றத்தில் முன்னிலைப்படுத்தப்பட்டனர். இதனைத் தொடர்ந்து, அவர்களை இந்த மாதம் 26ஆம் திகதி வரை விளக்கமறியலில் வைக்குமாறு நீதிமன்றம் உத்தரவிட்டது.
அதேநேரம், இந்த மோதலில் தொடர்புடைய மேலும் சில மாணவர்கள் கைது செய்யப்படவுள்ளதாகக் பொலிஸார் தெரிவித்துள்ளனர்.
இதற்கிடையே, இந்தச் சம்பவம் பல்கலைக்கழக வளாகத்திற்கு வெளியே இடம்பெற்றிருந்தாலும், பொலிஸாரின் தற்போதைய விசாரணைகளுக்குப் பல்கலைக்கழக நிர்வாகம் முழுமையான ஒத்துழைப்பை வழங்கும் என்று துணைவேந்தர் குறிப்பிட்டுள்ளார்.
மேலும், இந்த மோதலுக்கான காரணங்கள் குறித்து ஆராய்ந்து, எதிர்காலத்தில் இத்தகைய சம்பவங்கள் மீண்டும் இடம்பெறாதவாறு தேவையான நடவடிக்கைகளை எடுக்கப்போவதாகவும் துணைவேந்தர் தெரிவித்துள்ளார்.