திருமணத்திற்கு பணம் கேட்டு தொந்தரவு செய்த மகனை கொலை செய்த தந்தை

திருமண வைபவத்தை நடத்துவதற்காக லட்சக்கணக்கான ரூபா பணத்தை கோரி தொடர்ந்தும் தொந்தரவு கொடுத்து வந்ததாக கூறி, உறங்கிக்கொண்டிருந்த மகனை கோடாரியால் தாக்கி கொலை செய்தார் எனக் கூறப்படும் 65 வயதான நபர் பொலிஸாரால் கைது செய்யப்பட்டுள்ளார்.

ஓய்வுபெற்ற பாடசாலை அதிபரான இந்த சந்தேக நபரை நேற்று கைது செய்ததாக குருணாகல் ரிதிகம பொலிஸார் தெரிவித்துள்ளனர். மகனை கொலை செய்ததாக கூறப்படும் புழுவல் பிரதேசத்தை சேர்ந்த 65 வயதான நபர் ரிதிகம பொலிஸ் நிலையத்தில் சரணடைந்த பின்னர் கைது செய்யப்பட்டுள்ளார்.

எதிர்வரும் 10 ஆம் திகதி திருமணம்

சம்பவத்தில் 29 வயதான ஹேரத் முதியன்சலாகே பராக்கிரம பண்டார ஜயலத் இளைஞனே கொல்லப்பட்டுள்ளார். மூன்று பிள்ளைகளை கொண்ட குடும்பத்தில் ஜயலத் என்ற இளைஞன் மூத்த மகன் என்பதுடன் அவரது திருமணம் எதிர்வரும் 10 ஆம் திகதி நடக்கவிருந்தது.

அத்துடன் ஜயலத் என்ற இளைஞன் பல வருடங்களாக வெளிநாட்டில் தொழில் புரிந்து வந்துள்ளதுடன் அவ்வப்போது இலங்கை வந்து சென்றுள்ளார். திருமணம் செய்துக்கொள்வதற்காக இரண்டு மாதங்களுக்கு முன்னர் அவர் இலங்கை வந்துள்ளார்.

போதைப் பொருளுக்கு அடிமையாகி பணத்தை அழித்த மகன்

போதைப் பொருளுக்கு அடிமையான இந்த இளைஞன், தாம் சம்பாதித்த பணத்தை போதைக்கே அழித்துள்ளதாக பொலிஸார் கூறியுள்ளனர். பணம் இல்லாத காரணத்தினால், திருமண வைபவத்தை நடத்த தந்தையிடம் பணத்தை கேட்டு அடிக்கடி தொந்தரவு செய்துள்ளமை பொலிஸ் விசாரணைகளில் தெரியவந்துள்ளது.

மகன் தான் விரும்பியது போல் யுவதி ஒருவரை திருமணம் செய்ய முடிவு செய்ததால், சந்தேக நபரான தந்தையும் தாயும் அதற்கு சம்மதிக்கவில்லை என்பது சந்தேக நபரிடம் பொலிஸார் நடத்திய விசாரணைகளில் தெரியவந்துள்ளது.

வீட்டில் கட்டில் ஒன்றில் நேற்று அதிகாலை மகன் உறங்கிக்கொண்டிருந்த போது, சந்தேக நபர் கோடாரியால் தாக்கி கொலை செய்து விட்டு, பொலிஸில் சரணடைந்துள்ளார்.

65 வயதான இந்த சந்தேக நபர், குருகுல பாடசாலை ஒன்றில் அதிபராக கடமையாற்றியுள்ளார். இதனை தவிர பிரதேச கூட்டுறச்சங்க தலைவராகவும் பதவி வகித்துள்ளார். சந்தேக நபரின் மனைவி ஓய்வுபெற்ற ஆசிரியை என பொலிஸார் கூறியுள்ளனர்.

போதைப் பொருளுக்கு அடிமையான மகனை அதில் இருந்து மீட்க பல முறை முயற்சித்துள்ளதுடன் புனர்வாழ்வுக்கும் உட்படுத்தியுள்ளனர். எனினும் மகன் தொடர்ந்தும் போதைப் பொருளை பயன்படுத்தி வந்துள்ளதாக சந்தேக நபர் பொலிஸாருக்கு வழங்கிய வாக்குமூலத்தில் கூறியுள்ளார்.

கைது செய்யப்பட்டுள்ள தந்தை நீதிமன்றத்தில் முன்னிலைப்படுத்தப்பட உள்ளதுடன் கொல்லப்பட்ட மகனின் சடலம் பிரேதப் பரிசோதனைகளுக்காக குருணாகல் விசேட சட்டவைத்திய அதிகாரியிடம் அனுப்பி வைக்கப்பட்டுள்ளது.