நல்லூர் கந்தன் ஆலயத்திற்கு வரும் பக்தர்களுக்கு பொலிஸார் விடுத்துள்ள அறிவுறுத்தல்

நல்லூர் கந்தன் ஆலயத்திற்கு வருகை தரும் பக்தர்கள் தங்க ஆபரணம் அணிந்து வருவதை தவிர்த்துக்கொள்ளுமாறு யாழ்.பிராந்திய சிரேஷ்ட பொலிஸ் அத்தியட்சகர்உஜித் லியனகே தெரிவித்துள்ளார்.

யாழ்ப்பாணத்தில் இன்று இடம்பெற்ற ஊடகவியலாளர் சந்திப்பின்போது மேற்கண்டவாறு தெரிவித்துள்ளார்.மேலும் தெரிவிக்கையில்,

இந்த மாதம் முதலாம் திகதியில் இருந்து வரலாற்று பிரசித்தி பெற்ற நல்லூர் கந்தன் ஆலய வருடாந்த மகோற்சவம் ஆரம்பமாகி இடம்பெறுகின்றது.ஆலய வளாகத்தில் தேவையான அளவு பாதுகாப்பு பொலிஸாரினால் வழங்கப்பட்டுள்ளது.

பலப்படுத்தப்பட்டுள்ள பாதுகாப்பு

அத்தோடு விசேட பொலிஸ் அணியும் இங்கே வரவழைக்கப்பட்டு பாதுகாப்பு கடமையில் ஈடுபடுத்தப்பட்டுள்ளனர். யாழ்ப்பாணத்தில் மிகவும் முக்கியமான உற்சவமாக நல்லூர் ஆலய உற்சவம் இடம் பெறுவதனால் இந்த ஆலயத்தில் வரும் அடியவர்களின் எண்ணிக்கையும் அதிக அளவில் காணப்படும்.

ஆலயத்திற்கு வருகின்ற பக்தர்களுக்கு ஒரு கோரிக்கையை முன்வைக்கப்படுகின்றேன். தங்க ஆபரணங்கள் அணிந்து ஆலயத்திற்கு வருவதை தவிர்த்துக் கொள்ளுங்கள்.

ஏனென்றால் அதிக மக்கள் கூடும் இடத்தில் திருட்டு சம்பவங்களும் இடம்பெறலாம். அந்த திருட்டுக்களை தடுப்பதற்கு தங்களுடைய ஒத்துழைப்பு முக்கியம். இந்த திருட்டு சம்பவங்கள் இடம்பெறாமல் தடுப்பதற்கு பொதுமக்களின் ஒத்துழைப்பு மிகவும் அவசியமாகும்.

தங்க ஆபரணங்களை தவிர்த்துக்கொள்ளுங்கள்

திருட்டுச் சம்பவங்களை மேற்கொள்வதற்கு வெளி மாவட்டங்களிலிருந்து ஒரு சிலர் இங்கே அணியாக வந்து செயற்படுவார்கள். எனவே தங்களுடைய நகைகள் மற்றும் அதிக பணங்களை ஆலயத்திற்கு வரும்போது எடுத்து வருவதை தவிர்த்துக்கொள்ளுங்கள்.

அத்தோடு நல்லூர் வளாகத்தில் சிவில் மற்றும் பொலிஸ் சீருடையில் பொலிஸார் தேவையான அளவிற்கு பாதுகாப்பு கடமையில் ஈடுபடுத்தப்பட்டுள்ளனர்.

எனவே பொதுமக்கள் திருட்டு சம்பவங்களில் இருந்து தங்களை பாதுகாத்துக்கொள்ள வேண்டும்.அத்தோடு திருட்டுத் தொடர்பில் சந்தேகநபர்கள் தொடர்பில் தகவல் இருந்தால் பொலிஸாரிடம் தெரியப்படுத்தினால் உரிய நடவடிக்கை எடுக்கப்படும்.

டெங்கு மற்றும் கோவிட் தொற்று அதிகரிப்பு

குறிப்பாக தங்களுடைய வீடுகள், ஜன்னல்களை ஒழுங்காக பூட்டாமல் வெளியில் செல்லுதல் அல்லது பூட்டிவிட்டு திறப்பினை பாதுகாப்பில்லாத இடத்தில் பேணுவதால் திருட்டு சம்பவங்கள் இடம்பெறுகின்றன.

எனவே அவ்வாறான சம்பவங்களையும் பொதுமக்கள் நீங்கள் கருத்தில் எடுக்கக்கொள்ள வேண்டும். அத்தோடு தற்போதைய காலகட்டத்தில் டெங்கு மற்றும் கோவிட் தொற்று அதிகரித்து காணப்படுகின்றது.

எனவே கடந்த காலங்களில் பொலிஸாருக்கும் மற்றும் சுகாதாரப்பிரிவினருக்கும் பொது மக்கள் நீங்கள் ஒத்துழைப்பு வழங்கியதை போல தற்போது உள்ள நிலையிலும் பொலிஸார் மற்றும் சுகாதார பிரிவினருக்கு நோய் தொற்றில் இருந்து தப்பித்துக்கொள்வதற்கு உரிய ஒத்துழைப்பினை வழங்க வேண்டும் எனவும் குறிப்பிட்டுள்ளார்.