போதைப்பொருள் கடத்தலுடன் ஆயுதக் கடத்தலும்.. ஷிரான் பாசிக் விவகாரத்தில் நீதிமன்றத்தில் அதிர்ச்சித் தகவல்

டுபாயில் இருந்து நாடுகடத்தப்பட்ட பின்னர் இலங்கையில் கைது செய்யப்பட்டு தடுத்து வைக்கப்பட்டுள்ள ஷிரான் பாசிக், போதைப்பொருள் கடத்தலுக்கு மேலதிகமாக சட்டவிரோத ஆயுதக் கடத்தலிலும் ஈடுபட்டிருக்கலாம் என விசாரணைப் பிரிவினருக்கு நம்பகமான தகவல்கள் கிடைத்துள்ளதாகப் பிரதி சொலிசிட்டர் ஜெனரல் வசந்த பெரேரா நீதிமன்றத்தில் தெரிவித்துள்ளார்.

பயங்கரவாதத் தடைச் சட்டத்தின் கீழ் தம்மைத் தடுத்து வைத்துள்ளதைச் சவாலுக்கு உட்படுத்தி ஷிரான் பாசிக் தாக்கல் செய்த மனு, நேற்று (19) மேன்முறையீட்டு நீதிமன்றத்தில் விசாரணைக்கு எடுத்துக்கொள்ளப்பட்டது.

நம்பகமான தகவல்கள் 

நீதியரசர்களான மஹேன் கோபல்லவ மற்றும் ஏ. பிரேம்சங்கர் ஆகியோர் அடங்கிய குழாம் முன்னிலையில் இந்த மனு பரிசீலிக்கப்பட்டது.

மனுதாரர் சார்பில் முன்னிலையான சட்டத்தரணி சுரேஷ் ஞானராஜ், ஷிரான் பாசிக்கைப் பயங்கரவாதத் தடைச் சட்டத்தின் கீழ் கைது செய்து தடுத்து வைத்திருப்பது சட்டவிரோதமானது என நீதிமன்றத்தில் வாதிட்டார்.

சர்வதேச பொலிஸாரால் (INTERPOL) வெளியிடப்பட்ட சிவப்பு எச்சரிக்கை அறிவித்தலின் அடிப்படையிலேயே அவர் கைது செய்யப்பட்டதாகப் பொலிஸ் குறிப்புகளில் தெரிவிக்கப்பட்டுள்ளதாகவும், குறித்த போதைப்பொருள் வழக்கிலிருந்து அவர் விடுவிக்கப்பட்டதைத் தொடர்ந்து அந்த அறிவித்தல் நீக்கப்பட்டுள்ளதாகவும் சட்டத்தரணி சுட்டிக்காட்டினார்.

மேலும், 2012ஆம் ஆண்டு வெலிக்கடை சிறைச்சாலை கலவரம் மற்றும் கொக்கேய்ன் கடத்தல் தொடர்பான இரண்டு வழக்குகள் மட்டுமே தற்போது அவருக்கு எதிராக நிலுவையில் இருப்பதாகக் குறிப்பிட்ட அவர், பயங்கரவாதத் தடைச் சட்டத்தின் கீழ் அவரைத் தொடர்ந்து தடுத்து வைப்பதற்குப் போதுமான சட்டபூர்வமான அடிப்படைகள் இல்லை என்றும் வாதிட்டார்.

வீட்டிலிருந்து உணவு

இதற்குப் பதிலளித்த பிரதி சொலிசிட்டர் ஜெனரல் வசந்த பெரேரா, ஷிரான் பாசிக் சட்டவிரோத ஆயுதக் கடத்தலிலும் ஈடுபட்டிருக்கலாம் என்பதற்கான நம்பகமான தகவல்கள் விசாரணைப் பிரிவினருக்குக் கிடைத்துள்ளதாகத் தெரிவித்தார். அத்துடன், அவர் தீவிரவாத அமைப்புகளுடன் தொடர்புகளைப் பேணியுள்ளாரா என்பது குறித்தும் மேலதிக விசாரணைகள் முன்னெடுக்கப்பட்டு வருவதாகக் குறிப்பிட்டார்.

இந்த விசாரணைகளின் அடிப்படையில் முன்வைக்கப்பட்ட நியாயமான காரணங்களைக் கருத்திற்கொண்டே, பயங்கரவாதத் தடைச் சட்டத்தின் கீழ் அவரைத் தடுத்து வைத்துள்ளதாகவும் பிரதி சொலிசிட்டர் ஜெனரல் நீதிமன்றத்தில் வலியுறுத்தினார்.

விசாரணையின்போது, ஷிரான் பாசிக்கிற்கு வீட்டிலிருந்து மரக்கறி உணவைப் பெற்றுக்கொள்ள அனுமதி வழங்குமாறும், சட்டத்தரணிகளைச் சந்திப்பதற்குத் தற்போது வழங்கப்படும் நேரத்தை அதிகரிக்குமாறும் அவரது தரப்பு கோரிக்கை விடுத்தது.

மேலும், ஷிரான் பாசிக்கும் அவரது சட்டத்தரணிகளுக்கும் இடையிலான உரையாடல்களைப் பொலிஸார் பதிவு செய்வதாகவும் மனுதாரர் தரப்பு குற்றஞ்சாட்டியது.

இதற்குப் பதிலளித்த பிரதி சொலிசிட்டர் ஜெனரல், வீட்டிலிருந்து உணவைப் பெற்றுக்கொள்வதற்கான கோரிக்கை தொடர்பில் ஆராய வேண்டியுள்ளதாகவும், சந்தேகநபரின் பாதுகாப்பைக் கருத்திற்கொண்டே பொலிஸார் கட்டுப்பாடுகளை விதித்துள்ளதாகவும் தெரிவித்தார்.

இந்நிலையில், உணவு மற்றும் சட்டத்தரணிகளைச் சந்திப்பது தொடர்பான கோரிக்கைகளை நிறைவேற்றுவதற்கான சாத்தியக்கூறுகள் குறித்து ஆராய்ந்து, குறிப்பிட்ட நாளில் நீதிமன்றத்திற்கு அறிவிக்குமாறு நீதியரசர்கள் குழாம் பிரதி சொலிசிட்டர் ஜெனரலுக்கு உத்தரவிட்டது.

கொழும்பில் தொடரும் போராட்டம்! ஞானசார தேரர் விவகாரத்தில் வெடிக்கும் அரசியல் சர்ச்சை

அக்குரணையில் கோர விபத்து! சாரதிக்கு அடுத்தகட்டப் பரிசோதனை - பொலிஸார் வெளியிட்ட தகவல்