இலங்கைக்கு ஆபத்தாக மாறியுள்ள நோய்! - வைத்தியரின் எச்சரிக்கை

2022ம் ஆண்டின் முதல் 16 நாட்களில் இலங்கையில் ஐந்து மலேரியா நோயாளிகள் பதிவாகியுள்ளதாக மலேரியா எதிர்ப்பு பிரச்சாரத்தின் பணிப்பாளர் வைத்தியர் பிரசாத் ரணவீர தெரிவித்துள்ளார்.

இதன்படி, ​​ஐந்து நோயாளர்களும் ஆபிரிக்க நாடுகளிலிருந்து வந்தவர்கள் எனவும் அவர்களில் இருவர் யாழ்ப்பாணத்திலும் மற்ற மூவர் கொழும்பு, கம்பஹா மற்றும் காலி ஆகிய இடங்களிலும் வசிப்பவர்கள் என்றும் அவர் கூறினார்.

இந்நிலையில், குறித்த அனைவருக்கும் சிகிச்சை அளித்து வருவதாக அவர் கூறினார். கொழும்பு ஆங்கில ஊடகம் ஒன்றிடம் பேசிய அவர் இதனை தெரிவித்துள்ளார். ஆபிரிக்க நாடுகளில் இருந்து இலங்கைக்கு வந்தவர்களுக்கே மலேரியா தொற்று இருப்பது கண்டறியப்பட்டுள்ளது.

இவர்கள் ஐந்து ஆண்டுகளுக்கு மேலாக அங்கு வசித்து வந்துள்ளனர். கோவிட்-19 காலகட்டத்தில் ஆப்பிரிக்க நாடுகளில் மலேரியா கட்டுப்பாட்டுத் திட்டங்கள் தடைபட்டதால், நோய் அதிகரிப்புக்கான முக்கியக் காரணமாக அமைந்துள்ளது.

2021ம் ஆண்டில், 26 மலேரியா நோயார்கள் பதிவாகியுள்ளனர். இந்த ஆண்டின் முதல் 16 நாட்களில் ஐந்து நோயாளர்கள் கண்டறியப்பட்டுள்ளனர். இந்நிலை சிறப்பானது அல்ல. எதிர்காலத்தில் மேலும் பல வழக்குகள் கண்டறியப்படலாம் என்றும் அவர் கூறினார்.

“சமீபத்திய பயண வரலாறு மற்றும் காய்ச்சலால் அடையாளம் காணப்பட்ட எவருக்கும், உடனடியாக வைத்தியரை அணுகி அவர்களின் பயண வரலாறு குறித்து மருத்துவரிடம் தெரிவிக்க வேண்டும்.

மலேரியா நோயாளிகளை முன்கூட்டியே கண்டறிதல் மற்றும் முறையான மருந்துகள் அவசியம்”என்று வைத்தியர் ரணவீர கூறினார்.

இதற்கிடையில், மலேரியா எதிர்ப்பு பிரச்சாரம் மலேரியா நோயாளிகளைக் கண்டறிந்து சிகிச்சையளிப்பது குறித்து பொது சுகாதார ஆய்வக தொழில்நுட்ப வல்லுநர்களுக்கு பயிற்சி வழங்கியுள்ளது.

அவர்கள் நோயாளியை பரிசோதித்து மலேரியாவை அதன் ஆரம்ப நிலையிலேயே கண்டறிவார்கள். ஆரம்பத்தில் கண்டறியப்பட்டவர்களுக்கு வாய்வழி மருந்து வழங்கப்படலாம் என அவர் குறிப்பிட்டுள்ளார்.

"மலேரியா நோயால் கண்டறியப்பட்ட உள்ளூர் மற்றும் வெளிநாட்டு நோயாளிகளுக்கு அரசு மற்றும் தனியார் துறை வைத்தியசாலைகளில் இலவச சிகிச்சை அளிப்பதே நாட்டின் தேசிய கொள்கை" என்று அவர் கூறினார்.

இலங்கையில் கடைசியாக மலேரியா மரணம் 2007 இல் பதிவாகியுள்ளதாக வைத்தியர் ரணவீர கூறினார். மலேரியா எதிர்ப்பு பிரச்சாரம் நாட்டில் மீண்டும் இந்த நோய் வருவதைத் தடுக்கவும் அதன் விளைவாக ஏற்படும் இறப்புகளைத் தடுக்கவும் விரும்புகிறது எனவும் அவர் கூறியுள்ளார்.