இலங்கையின் வெளிநாட்டு கடனில் அடுத்த 10 ஆண்டுகளில் ஏற்படவுள்ள மாற்றம்! வெளியான அறிவிப்பு

அடுத்த 10 ஆண்டுகளுக்கு இலங்கை தனது வெளிநாட்டுக் கடனை எந்த பிரச்சினையுமின்றி திருப்பிச்செலுத்த முடியும் என்று மத்திய வங்கி ஆளுநர் நந்தலால் வீரசிங்க தெரிவித்துள்ளார்.

இலங்கை மற்றொரு கடன் தவணை தவறுதலையோ அல்லது கடன் நெருக்கடியையோ சந்திக்காது என்றும் கூறியுள்ளார்.

இலங்கை தனது கடன் மறுசீரமைப்பு செயல்முறையை வெற்றிகரமாக நிறைவு செய்துள்ளதால், அடுத்த 10 ஆண்டுகளில் ஆண்டுதோறும் செலுத்தப்பட வேண்டிய வெளிநாட்டு கடனின் அளவு 4 பில்லியன் அமெரிக்க டொலருக்கும் குறைவாக இருக்கும் என்றும் தெரிவித்துள்ளார்.

நாட்டின் மொத்த உத்தியோகப்பூர்வ கையிருப்பு 

இதற்கமைய, ஆண்டுதோறும் செலுத்தப்பட வேண்டிய அந்த கடன் தொகையை எந்த பிரச்சினையுமின்றி திருப்பி செலுத்துவதற்கு தேவையான மொத்த உத்தியோகப்பூர்வ கையிருப்பை நாடு உருவாக்கி வருகின்றதாகவும் அவர் நம்பிக்கை வெளியிட்டுள்ளார்.

சுற்றுலா வருவாய், வெளிநாடுகளில் உள்ள இலங்கையர்களிடமிருந்து வரும் பணப்பரிமாற்றங்கள் மற்றும் சர்வதேச நாணய நிதியம், உலக வங்கி மற்றும் ஆசிய அபிவிருத்தி வங்கி ஆகியவற்றிலிருந்து பெறப்படும் கடன்கள் ஆகியவற்றின் ஆதரவுடன், நாட்டின் மொத்த உத்தியோகப்பூர்வ கையிருப்பு இந்த ஆண்டின் இறுதியில் 8 பில்லியன் அமெரிக்க டொலராக அதிகரிக்கும் என்று கணிக்கப்பட்டுள்ளதாக கூறியுள்ளார்.

நாட்டின் தற்போதைய மொத்த உத்தியோகப்பூர்வ கையிருப்பு 6.8 பில்லியன் அமெரிக்க டாலராக உள்ளது. இந்த ஆண்டின் இறுதியில் 8 பில்லியன் அமெரிக்க டொலராக உயரும் என எதிர்பார்க்கப்படும் நாட்டின் மொத்த உத்தியோகபூர்வ அந்நிய செலாவணி கையிருப்பு, வரும் ஆண்டுகளில் 10 பில்லியன் அமெரிக்க டொலராக அதிகரிக்கும் என்று மத்திய வங்கி ஆளுநர் சுட்டிக்காட்டியுள்ளார்.

இதன் விளைவாக, இலங்கை ஆண்டுக்கு 4 பில்லியன் அமெரிக்க டொலருக்கும் குறைவான அந்நியக்கடன் செலுத்துதலை எந்த பிரச்சினையுமின்றி செய்ய முடியும் என்று வீரசிங்க கூறியுள்ளார்.

மத்திய கிழக்கு நெருக்கடி

மத்திய கிழக்கு நெருக்கடி மற்றும் பருவநிலை மாற்றம் காரணமாக உலகளாவிய எரிபொருள் விலைகளில் நிலவும் நிச்சயமற்ற தன்மைகள் இருந்தபோதிலும், இலங்கையால் அத்தகைய பொருளாதார வளர்ச்சியை அடைய முடியும் என்றும் அவர் குறிப்பிட்டுள்ளார்.

இந்த ஆண்டின் முதல் பாதியில் இலங்கை 5 சதவிகித பொருளாதார வளர்ச்சி விகிதத்தை எட்டியுள்ளது என்றும் அவர் குறிப்பிட்டுள்ளார். நாட்டின் பொருளாதார வளர்ச்சிப் பாதை சர்வதேச அளவிலும் பாராட்டப்பட்டுள்ளது என்று மத்திய வங்கி ஆளுநர் தெரிவித்துள்ளார்.

எரிபொருள் மற்றும் போக்குவரத்துச் செலவுகள் அதிகரித்ததன் காரணமாக பணவீக்கம் தற்காலிகமாக 7 சதவீதமாக உயர்ந்திருந்தாலும், மத்திய வங்கியின் பணவியல் கொள்கை நடவடிக்கைகளால் அடுத்த ஆண்டின் முதல் பாதியில் அது 5 சதவீத இலக்கு நிலைக்கு திரும்பும் என்று அவர் சுட்டிக்காட்டியுள்ளார்.    

அவசரமாக அதிஉயர் பாதுகாப்பு சிறைக்கு இடமாற்றப்பட்டுள்ள பாதாள உலகக்குழுவின் முக்கிய புள்ளி

பேரழிவு ஏற்படலாம்! நேபாள வெள்ளப்பெருக்கையடுத்து இலங்கைக்கு விடுக்கப்பட்டுள்ள எச்சரிக்கை