வெள்ள நீரால் யாழில் ஏற்பட்டுள்ள பாதிப்பு

நாட்டில் நிலவி வருகின்ற சீரற்ற வானிலை காரணமாக அதிகரித்த மழைவீழ்ச்சியால் நாட்டின் பல்வேறு பகுதிகளிலும் பல பாதிப்புக்கள் ஏற்பட்டு வரும் நிலையில் யாழ். தென்மராட்சி கிழக்கு கொடிகாமம் பகுதியிலும் வெள்ளநீர் காரணமாக மக்கள் பதிக்கப்பட்டுள்ளனர்.

பாடசாலைகளில் தங்க வைக்கப்பட்டுள்ள மக்கள் 

அதாவது கொடிகாமம் மத்தி, கொடிகாமம் தெற்கு பகுதிகள் வெள்ளத்தில் மூழ்கியுள்ளதால் மக்கள் வீடுகளை விட்டு வெளியேறிய நிலையில் பாடசாலைகளில் தங்க வைக்கப்பட்டுள்ளனர்.

அந்தவகையில் இன்று மாலை வரை யா/கொடிகாமம் திருநாவுக்கரசு ஆரம்பப் பாடசாலையில் 25 குடும்பங்களைச் சேர்ந்த 66 பேரும், யா/கொடிகாமம் அரசினர் வித்தியாலயத்தில் 31 குடும்பங்களைச் சேர்ந்த 86 பேரும், யா/போக்கட்டி றோமன் கத்தோலிக்க தமிழ்க் கலவன் பாடசாலையில் 26 குடும்பங்களைச் சேர்ந்த 74 பேரும், யா/போக்கட்டி அ.த.க பாடசாலையில் 17 குடும்பங்களைச் சேர்ந்த 64 பேரும் கச்சாய், மகாவித்தியாலயத்தில் 8 குடும்பங்களைச் சேர்ந்த 17 பேரும் தங்க வைக்கப்பட்டுள்ளனர்.

மேலும் மழை வீழ்ச்சி அதிகரித்தால் இன்னும் அதிகமானோர் இடம்பெயர வேண்டிய நிலை ஏற்படும் எனவும் தெரிவிக்கப்படுகின்றது. 

கட்டைக்காட்டில் வீடுகளுக்குள் புகுந்தது வெள்ள நீர்

யாழ்ப்பாணம் வடமராட்சி கிழக்கு கட்டைக்காட்டு பகுதியில் தொடர் மழை பெய்துவருவதால் பல குடும்பங்கள் பாதிப்படைந்துள்ளன.

குறித்த பகுதியில் கடும் காற்றுடன் மழை தொடர்ந்து பெய்துவருவதால் வீடுகளுக்குள் மழை வெள்ளம் புகுந்துள்ளது.

அப்பகுதியில் வசிக்கும் பல குடும்பங்கள் இடம்பெயர்ந்துள்ளதுடன் வெள்ளத்தால் பாதிக்கப்பட்ட பகுதிகளை அப்பகுதி கிராம அலுவலர் பார்வையிட்டு வருகின்றார்.

கடும் குளிர் காற்று வீசுவதால் குழந்தைகளுடன் இருப்பவர்கள் மிகவும் மோசமாக பாதிப்படைந்துள்ளதாக அங்கிருந்துவரும் செய்திகள் தெரிவிக்கின்றன.

தகவல் - எரிமலை

மீன்பிடி படகுகளை பாதுகாப்பான இடத்திற்கு நகர்த்திய மீனவர்கள்

யாழ்ப்பாணம் வடமராட்சி கிழக்கு கட்டைக்காடு பகுதியில் சீரற்ற காலநிலை தொடர்ந்து வருகிறது பலத்த காற்றுடன் தற்போதும் மழை பெய்து வருகிறது.

இதனால் பல பகுதிகள் வெள்ளக்காடாக காட்சியளிக்கின்றன பலரின் வீடுகளுக்குள் வெள்ளநீர் புகுந்துள்ளதால் பல குடும்பங்கள் இடம்பெர்ந்துள்ளன.

மீன்பிடி வாடிகள் உட்பட மீன்பிடி உபகரணங்கள் சேதம் அடைந்துள்ளன. இதனால் கடைக்காடு மீனவர்கள் தங்களுடைய மீன்பிடி படகுகளை பாதுகாப்பான இடத்திற்கு நகர்த்தி வருகின்றனர். 

வடமராட்சி கிழக்கு பகுதியில் இறந்த நிலையில் கால்நடைகள்

நாட்டில் நிலவி வரும் சீரற்ற காலநிலை காரணமாக நாட்டின் பல பகுதிகள் முழுமையாக பாதிக்கப்பட்டுள்ளது.

அந்த வகையில் யாழ். வடமராட்சி கிழக்கு புன்னையடி பகுதியில் கால்நடைகள் இறந்து இருப்பதை காணக்கூடியதாக உள்ளது.

இறந்து கிடக்கும் கால்நடைகளை அகற்றும் பணிகளை உடனடியாக பருத்தித்துறை பிரதேச சபை மேற்கொண்டு வருகின்றனர். கால்நடைகள் உயிரிழந்தமைக்கான காரணம் என்ன என தெரியவரவில்லை.

தகவல் - கஜிந்தன் 

வல்வெட்டித்துறை ஆதீகோவிலடியில் படகுகள் சேதம்..!

யாழ்ப்பாணம் வல்வெட்டித்துறை ஆதிகோவிலடி பகுதியில் வீசிய புயல்காற்றினால் பல படகுகள் பாறைகளில் மோதி சேதமடைந்துள்ளதுடன் பலரது வலைகள் மற்றும் கடற்றொழில் உபகரணங்களும் கடலிற்குள் இழுத்துச்செல்லப்பட்டுள்ளது.

பாதிக்கப்பட்ட மீனவர்கள் தமது படகுகளை மீட்டெடுப்பதுலும் காணாமல் போன வலைகள் மற்றும் கடற்றொழில் உபகரணங்களை தேடும் பணியில ஈடுபட்டுள்ளனர்.

பலாலி பொலிஸ் நிலையத்துக்குள் புகுந்த வெள்ள நீர்

நாட்டில் நிலவிவரும் சீரற்ற காலநிலையால் பாதுகாப்பு படைகளின் முகாம் மற்றும் அலுவலகங்களும் பாதிப்படைந்துள்ளன.

அந்தவகையில் யாழ்ப்பாணம் பலாலி பொலிஸ் நிலையத்திற்குள் வெள்ள நீர் புகுந்துள்ளதால் பொலிசார் பல்வேறு சிரமத்தை எதிர் கொண்டுள்ளனர்.

வெள்ள நீரை அகற்ற முடியாத நிலை காணப்படுவதுடன் தொடர்ச்சியாக மழையும் பெய்துவருவதால் பொலிசாரின் சேவைகளும் சிரமத்திற்குள்ளாகியுள்ளது யாழ் பலாலி பகுதியில் அதிகளவான இடத்தில் வெள்ள நீர் தேங்கி காணப்படுவதால் அப்பகுதியில் போக்குவரத்தும் தடைப்பட்டுள்ளது.