படகு விபத்திலிருந்து மீட்கப்பட்ட 27 பேர் கிறிஸ்மஸ் தீவுக்குக் கொண்டு செல்லப்பட்டுள்ளனர்.

கடலில் மூழ்கிய இலங்கைப் படகு, காக்கஸ் தீவுக்கு அருகே தொடர்ந்து செல்ல முடியாமல் சிக்கித் தவித்தது. இதையடுத்து அவசர கால செய்தியை படகின் ஓட்டுநர் அனுப்பினார்.

இதைத் தொடர்ந்த ஆஸ்திரேலிய விமானக் கண்காணிப்புப் பிரிவினர் கடற்படைக்குத் தெரிவித்து மீட்புக் கப்பலை விரைந்து போகச் செய்தனர். மீட்புக் கப்பல் வந்த பின்னரே கடலில் மூழ்கியவர்களை மீட்கும் பணி நடந்தது.

மீட்கப்பட்டவர்கள் பெரும் குரலில் கதறி அழுததாகவும், அது மனதை இளகச் செய்வதாக இருப்பதாகவும் மீட்புப் படையினர் தெரிவித்தாக செய்திகள் கூறுகின்றன.

இந்தப் படகில் 39 பேர் இருந்ததாக தெரிகிறது.

இதுவரை ஒரு தமிழரின் மரணம் மட்டும் உறுதி செய்யப்பட்டுள்ளது. 11 பேரைக் காணவில்லை என்று ஆஸ்திரேலிய உளதுறை அமைச்சர் பிரன்டன் ஓ கானர் தெரிவித்துள்ளார்.

இதுவரை 27 பேர் மீட்கப்பட்டுள்ளனர். இவர்கள் கிட்டத்தட்ட 16 மணி நேரம் படகின் உடைந்த பாகங்களைப் பிடித்தபடி கடல் நீரில் தத்தளித்துள்ளனர்.

படகு விபத்தில் சிக்கிய தமிழர்கள் குறித்து அகதிகளுக்கான வழக்கறிஞர் பமீலா கர் கூறுகையில், இவர்கள் அனைவரும் நேரடியாக இலங்கையிலிருந்து வந்ததவர்கள் என்றும், மலேசியா அல்லது இந்தோனேசியாவின் பிடியில் சிக்கி விடாமல் இருப்பதற்காக நேரடியாக வந்ததாகவும் தமிழ் அமைப்புகளின் தலைவர்கள் தெரிவித்துள்ளனர் என்றார்.

சிலோன் தமிழர்களுக்கான நீதி மற்றும் சுதந்திரம் என்ற அமைப்பின் தலைவர் ராமலிங்கம் விக்கிரமசிங்கம் கூறுகையில், படகு மூழ்கிய தகவல் பரவியதும் கொழும்பில் உள்ள தமிழர்கள் படகில் இருந்தவர்கள் குறித்து ஆஸ்திரேலியாவில் உள்ள தங்களது உறவினர்கள், நண்பர்களுக்கு தொலைபேசி மூலம் கேட்டறிந்த வண்ணம் உள்ளனர்.

படகு விபத்தில் சிக்கியவர்கள் இலங்கைத் தமிழர்கள் என்பதால் நாங்கள் அச்சத்துடன் உள்ளோம் என்றார்.

பிந்திய செய்தி

அவுஸ்திரேலிய கடற்பரப்பில் நேற்று காலை மூழ்கிய படகில் இருந்த மேலும் இருவரின் சடலங்கள் இன்று மீட்கப்பட்டுள்ளன. நேற்றும் ஒரு சடலம் மீட்கப்பட்டது
 
 இவர்கள், இலங்கையின் கிழக்கு பகுதியில் இருந்து அண்மையில் புறப்பட்டு வந்தவர்களாக இருக்கலாம் என கனேடிய தமிழ் காங்கிரஸின் தலைவர் சாரதா நாதன் தெரிவித்துள்ளார்
 
தமது உறவினர்களுக்கு என்ன நடந்தது என பலர் கிழக்கில் இருந்து தொடர்பு கொண்டு கேட்பதாகவும் அவர் குறிப்பிட்டுள்ளார்.
 
படகில் பயணித்தவர்கள் அனைவரும் ஆண்கள் எனக் குறிப்பிட்டுள்ள அவர், அவர்கள் மூன்று வார காலம் கடலில் பயணித்தே அவுஸ்திரேலிய கடற்பரப்புக்கு வந்துள்ளதாக தெரிவித்துள்ளார்.
 
படகு பயணம் ஆபத்தானது என்ற போதும் இலங்கையில் வசிப்பது அதனை விட ஆபத்தானது என அவர்கள் குறிப்பிட்டுள்ளதாகவும் சாரதா நாதன் தெரிவித்துள்ளாh