இலங்கையின் புதிய எதிர்க்கட்சி கூட்டணி இன்று அமைக்கப்பட்டுள்ளது. ஐக்கிய தேசியகட்சி தலைமையிலான ஐக்கிய தேசிய முன்னணி என்ற கூட்டணியே இன்று முற்பகல் இலங்கையின் நாடாளுமன்ற கட்டிடத்தொகுதியில் வைத்து ஆரம்பிக்கப்பட்டுள்ளது.

இது தொடர்பான உடன்படிக்கையில், ரணில் விக்கிரமசிங்கவின் தலைமையிலான ஐக்கிய தேசியக் கட்சி, மங்கள சமரவீரவின் ஸ்ரீலங்கா சுதநதிர கட்சியின் மக்கள் பிரிவு, மனோ கணேசனின் ஜனநாயக மக்கள் முன்னணி, ஸ்ரீலங்கா முஸ்லிம் காங்கிரஸ் ஆகியன கைச்சாத்திட்டுள்ளன.
 
இலங்கையில் மஹிந்த ராஜபக்சவின் ஆட்சிக்கு நிகராக எதிர்கட்சி ஒன்று இல்லாத நிலையில் இந்த கூட்டணியின் அமைப்பு முக்கியத்துவம் பெறுகிறது.
 
இதன் அடிப்படையில் எதிர்வரும் ஜனாதிபதி தேர்தல் மற்றும் பொதுத்தேர்தல் என்பவற்றில் இந்தக்கூட்டணி ஆளும் தரப்பிற்கு சவாலாக இருக்கும் என எதிர்ப்பார்க்கப்படுகிறது.

நாடாளுமன்றக் கட்டிடத் தொகுதியில் இன்றைய தினம் இந்த ஒப்பந்தம் கைச்சாத்திடப்பட்டுள்ளதாகத் தெரிவிக்கப்படுகிறது.
 
எதிர்க்கட்சிகளின் கூட்டமைப்பின் தலைமைத்துவத்தை எதிர்க்கட்சித் தலைவர் ரணில் விக்ரமசிங்க வகிக்க உள்ளதாகத் தெரிவிக்கப்படுகிறது.
 
இன்று முற்பகல் 11.30 மணிக்கு சுப முகூர்த்தத்தில் இந்த ஒப்பந்தம் கைச்சாத்திடப்பட்டுள்ளதாகக் குறிப்பிடப்படுகிறது.
 
நிறைவேற்று அதிகார ஜனாதிபதி முறைமையை இல்லாதொழித்தல் உள்ளிட்ட பல்வேறு முக்கிய கொள்கைகளின் அடிப்படையில் எதிர்க்கட்சிக் கூட்டணி அமைக்கப்பட்டுள்ளது.
 
 ஒப்பந்தம் கைச்சாத்திடப்பட்டதன் பின்னர் விசேட வாகனத் தொடரணி மூலம் கண்டி தலதா மாளிகைக்கு விஜயம் செய்ய உள்ளதாகத் தெரிவிக்கப்படுகிறது.